Erlan Qarın álemdik dinı kóshbasshylarmen birqatar kezdesý ótkizdi

Álemdik jáne dástúrli dinder lıderleri sezi Hatshylyǵynyń XXIV otyrysy aıasynda Sezd Hatshylyǵynyń basshysy – Vıtse-Prezıdent Erlan Qarın birqatar ekijaqty kezdesý ótkizdi.

Kezdesýler barysynda aldaǵy otyrystyń kún tártibi jáne Sezd aıasyndaǵy yntymaqtastyqty odan ári damytý máseleleri talqylandy.

Kavkaz musylmandary basqarmasynyń tóraǵasy Sheıh-ýl-Islam Allahshúkir Pashazademen kezdesýde onyń Sezdiń qalyptasýy men dinaralyq dıalogty damytýǵa qosqan kópjyldyq jeke úlesi atap ótildi. Erlan Qarın onyń beıbitshilik, ózara qurmet pen kelisim ıdeıalaryn ilgeriletýdegi eńbeginiń mańyzdylyǵyna toqtaldy.

Ál-Azhar Joǵarǵy ımamynyń halyqaralyq yntymaqtastyq jónindegi keńesshisi Abdýlrahman Musa Qazaqstan Prezıdenti Qasym-Jomart Toqaevqa Joǵarǵy ımamnyń sálemi men izgi tilegin jetkizdi. Kezdesý barysynda Qazaqstannyń Ál-Azharmen ózara is-qımyly, onyń ishinde dinı bilim berý, aǵartý jáne dinaralyq dıalog salalaryndaǵy yntymaqtastyqty damytý áleýeti talqylandy.

Búkilálemdik Islam lıgasy Bas hatshysynyń orynbasary Abdýlrahman Abdýlla ál-Zaıdpen kezdesýde Lıganyń Sezd jumysyna kóp jyldan beri qatysyp kele jatqany ári dinaralyq dıalogty damytýǵa qosqan úlesi sóz boldy. Erlan Qarın forýmnyń qyzmeti men praktıkalyq bastamalaryn odan ári qoldaýdyń mańyzdylyǵyn jetkizdi.

Anglıkan qaýymdastyǵy Bas hatshysynyń orynbasary, epıskop Djo Beılı Ýellspen kezdesýde qaýymdastyqtyń Sezd jumysyna belsendi qatysqany jáne forýmdy damytýǵa sińirgen eńbegi atap ótildi. Sondaı-aq 2028 jyly Astanada uıymdastyrylatyn Sezdiń IX otyrysyna Kenterberı arhıepıskopy Sara Mallalıdiń qatysýyna tilektestik bildirildi.

Sonymen qatar sheteldik qonaqtar Qazaqstandy jańa Konstıtýtsııanyń qabyldanýymen quttyqtady.

Aıta ketelik sheteldik mıssıonerler Qazaqstanda qandaı dinı ilimdi ýaǵyzdap júrgeni týraly jazǵan edik.