«Adal azamat» baǵdarlamasynyń mazmunyna ózgerister engizilip jatyr – Erlan Qarın
ASTANA. KAZINFORM - Memleket basshysynyń tapsyrmasymen jańa Konstıtýtsııanyń qabyldanýyna jáne qoǵamda kitap oqý mádenıetin ilgeriletýge oraı «Adal azamat» baǵdarlamasy men brendbýk mazmunyna ózgerister engizilip jatyr, dep jazdy búgin óziniń Instagram paraqshasynda, QR Vıtse-Prezıdenti Erlan Qarın.
Onyń aıtýynsha, Memleket basshysynyń tapsyrmasyna sáıkes, «Adal azamat» birtutas tárbıe baǵdarlamasy ázirlenip, barlyq bilim berý mekemelerine engizilgeni belgili. Osylaısha, ár oqý ordasynyń óz betinshe jumys isteý tájirıbesi tyıylyp, bul úderis tolyqtaı ortalyqtandyryldy. Bul baǵdarlamanyń maqsaty oqýshylardy - eńbekqorlyq, ádeptilik, bilimpazdyq, jaýapkershilik, tazalyq sııaqty qundylyqtarǵa baýlý.
- «Adal azamattyń» mazmunyn jańa talaptar men suranystarǵa, irgeli ózgeristerge baılanysty árdaıym jańartyp otyrý mańyzdy. Bul rette Prezıdent tapsyrmasymen jańa Konstıtýtsııanyń qabyldanýyna jáne qoǵamda kitap oqý kýltin ilgeriletýge baılanysty baǵdarlama men brendbýk mazmunyna ózgerister engizilip jatyr,-dedi Erlan Qarın.
Bıyldyń ózinde respýblıka boıynsha 2 myń mektepti qamtý kózdelip otyr. Al Astana qalasyndaǵy josparǵa engizilgen 120 mekteptiń 90-ynda tıisti jumystar oıdaǵydaı atqaryldy. Biryńǵaı tárbıe baǵdarlamasy men dızaın-kod qoǵamdyq etıkanyń jańa júıesin bekitýge yqpal etedi. Bul óz kezeginde jas urpaqty tártip pen tazalyqqa baýlıdy ári jasampaz, progressıvti qundylyqtardy damytady.
Aıta keteıik, osyǵan deıin Memleket basshysy Qasym-Jomart Kemeluly Toqaevtyń «Adal azamat» birtutas tárbıe baǵdarlamasynyń qoldanys aıasyn keńeıtý jónindegi tapsyrmasyna sáıkes elimizdiń mektepterinde biryńǵaı tárbıelik orta qalyptastyrý jumystary júrgizilip jatqany týraly jazdyq.
