Erlan Qarın: 1 shildeden bastap Konstıtýtsııalyq reformanyń úshinshi kezeńi bastalady
ASTANA. KAZINFORM — Memleket basshysy birqatar konstıtýtsııalyq zańǵa qol qoıyp, eldegi saıası reformalardyń ekinshi kezeńin qorytyndylady. Prezıdent keńesshisi Erlan Qarınniń aıtýynsha, 1 shildeden bastap reformalardyń úshinshi kezeńi bastalyp, Quryltaı depýtattaryn saılaý men Qazaqstan Halyq Keńesin qurý arqyly memlekettik-saıası modeldi jańǵyrtý jalǵasady.
Erlan Qarın búgin Memleket basshysy birqatar konstıtýtsııalyq zańǵa qol qoıǵanyn aıtty:
— Qazaqstan Respýblıkasynyń Prezıdenti týraly;
— Qazaqstan Respýblıkasynyń Quryltaıy jáne onyń depýtattarynyń mártebesi týraly;
— Qazaqstan Halyq Keńesi týraly;
— Qazaqstan Respýblıkasy astanasynyń mártebesi týraly;
— Qazaqstan Respýblıkasynyń ákimshilik-aýmaqtyq qurylysy týraly.
— Referendýmda qabyldanǵan jańa Ata Zań Konstıtýtsııalyq reformanyń birinshi kezeńinde júzege asyrylsa, zańdardyń jáne basqa da quqyqtyq aktiler toptamasynyń bekitilýimen reformanyń ekinshi kezeńi túıindeledi. Al 1 shildeden reformanyń úshinshi kezeńi bastalady. Bul memlekettik-saıası modeldi jańǵyrtýǵa baǵyttalǵan, — dep jazdy Prezıdent keńesshisi.
Onyń aıtýynsha, aldymen Quryltaı depýtattarynyń saılaýy ótedi, odan keıin Qazaqstan Halyq Keńesi qurylady, onyń izin ala bıliktiń ózge de negizgi ınstıtýttary jańarady.
— Reformalardyń jalpy qısyny kezeń-kezeńimen júzege asyrylýynda: aldymen tujyrymdama, sodan soń quqyqtyq baza, odan keıin memlekettiń saıası modeliniń jańarýy. Ózgeristerdiń qarqynyna da erekshe nazar aýdarǵan jón. Reformalar toqtaýsyz ári maqsatty túrde júrgizilýde, sondaı-aq naqty ári salmaqty sabaqtastyqqa negizdelgen. Munyń barlyǵy Memleket basshysynyń saıası stıline tán dúnıeler. Osylaısha, keń aýqymdaǵy qoǵamdyq kelisimge súıengen júıeli ári dáıekti jańǵyrý qazirgi Qazaqstannyń basty ereksheligine aınalyp keledi, — dedi ol.
Aıta keteıik, Qarın buǵan deıin Prezıdent sózindegi 9 dáıekti oı-tujyrymdy ataǵan bolatyn.
