Ereımentaýda 37 myń iri qaraǵa arnalǵan keshen salynady
ASTANA. KAZINFORM — Aqmola oblysynda et óndirisin damytatyn aýqymdy joba qolǵa alyndy, dep habarlaıdy Aýyl sharýashylyǵy mınıstrliginiń baspasóz qyzmeti.
Óńirde mal sharýashylyǵyn damytý jáne salanyń eksporttyq áleýetin arttyrýǵa baǵyttalǵan et klasterin qurý boıynsha júıeli jumystar qolǵa alynyp jatyr. Klasterdi qalyptastyrý ortalyǵy Ereımentaý aýdany bolmaq.
— Jobany «Sokolınkı ı K», «Torǵaı» jáne «Nomad» seriktestikteri júzege asyrady, jıyntyq qýaty 37 myńnan astam iri qarany quraıdy. Joba 300-ge deıin fermer qojalyqtaryn qurý arqyly fermerlik kooperatsııany damytýǵa kóńil bólmek. Jalpy ınvestıtsııa kólemi 16,4 mlrd teńge, búginge deıin onyń 5 mlrd teńgesi salynǵan. Óńirge 4,4 myń bas analyq iri qara mal ákelindi, — delingen habarlamada.
Basym baǵyttardyń biri joǵary ónimdi jáne óńirdiń klımattyq jaǵdaıyna beıimdi qalmaq tuqymdy iri qara malyn ósirý.
Qurylatyn et klasteri asyl tuqymdy mal sharýashylyǵyn, fermer qojalyqtaryn jáne ónerkásiptik bordaqylaýdy biryńǵaı jabyq óndiristik tizbek aıasynda biriktiredi dep kútiledi. Bul agrarlyq sektorda shaǵyn jáne orta bıznestiń turaqty ekojúıesin qalyptastyrýǵa jol ashpaq. Nátıjesinde 240 turaqty jáne 500 maýsymdyq jumys orny ashylady.
Sonymen qatar, jyl saıyn 7 myń tonnaǵa deıin etti eksportqa shyǵarý josparlanǵan, bul bıýdjetke salyq túrinde 1,3 mlrd teńge túsimdi qamtamasyz etedi.
Osydan buryn Aqmola oblysyna qalmaq tuqymdy 4 300 bas iri qara mal ákelingenin jazdyq.