Erevanda TMD ǵalymdarynyń forýmy ótedi
ASTANA. QazAqparat - 2018 jylǵy 15-16 qazan kúnderi Erevan qalasynda Táýelsiz Memleketter Dostastyǵy ǵalymdarynyń ІІ forýmy bolady, dep habarlaıdy QazAqparat TMD Atqarý komıtetiniń baspasóz qyzmetine silteme jasap.
Forým TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń qoldaýymen ótpek. Ǵylymı sharanyń basty uıymdastyrýshylary - Armenııa Respýblıkasynyń Ulttyq ǵylym akademııasy men Ǵylym jáne bilim mınıstrligi.
«Forýmdy ótkizýdegi basty maqsat - TMD elderiniń ǵylymı-tehnıkalyq yntymaqtastyǵyn jandandyrý jáne damytý, birlesken zertteýler júrgizýge jańa serpin berý, elderdiń ınnovatsııalyq saıasatyn damytý jóninde usynystar ázirleý, sondaı-aq jastar arasynda ǵylym men ǵylymı qyzmetti nasıhattaý», - deıdi TMD Atqarý komıtetiniń qyzmetkerleri.
Jalpy otyrystan tys, forým aıasynda «Іrgeli ǵylymnyń qazirgi ahýaly jáne damý perspektıvalary», «Tsıfrlyq kezeńdegi ǵylymı yntymaqtastyqty jetildirý», «Innovatsııalyq ǵylymı zertteýler» taqyryptarynda dóńgelek ústelder ótedi.
