Erevanda saılaý ýchaskesi óz jumysyn bastady
ASTANA. KAZINFORM – Jergilikti ýaqyt boıynsha saǵat 07:00-de Qazaqstannyń Armenııadaǵy elshiliginiń ǵımaratynda ornalasqan №407 saılaý ýchaskesi referendýmda daýys berý úshin esigin aıqara ashty, dep habarlaıdy Kazinform agenttiginiń menshikti tilshisi.
Ýchaske jumysy saltanatty jaǵdaıda Qazaqstannyń ánuranynyń oryndalýymen bastaldy. Ashylý saltanatynan keıin ýchaskelik saılaý komıssııasynyń músheleri jumysqa kiristi.
№407 saılaý ýchaskesinde saılaýshylar arasynda Armenııada ýaqytsha turatyn Qazaqstan azamattary, jergilikti joǵary oqý oryndarynda bilim alyp júrgen qazaqstandyqtar, sondaı-aq Mhıtar Geratsı atyndaǵy Erevan memlekettik medıtsına ýnıversıtetinde boqyp júrgen QR Qorǵanys mınıstrliginiń kýrsanttary bar. Ýchaskelik saılaý komıssııasynyń tóraǵasy Álıhan Ahmetovtyń aıtýynsha, saılaý ýchaskesinde barlyǵy 54 Qazaqstan azamaty tirkelgen.
Saılaý ýchaskesinde daýys berý jergilikti ýaqyt boıynsha saǵat 20:00-ge deıin jalǵasady. Ýchaske jabylǵannan keıin saılaý komıssııasynyń músheleri daýystardy sanaýǵa kirisedi.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.
Respýblıkalyq referendým bıýlleteninde bir ǵana saýal bolady: Siz Qazaqstanda atom elektr stantsııasyn salýǵa kelisesiz be? Daýys berýshi jaýaptyń eki nusqasynyń birin tańdaıdy: «Iá, kelisemin» nemese, «Joq, kelispeımin».
Memlekettik keńesshi Erlan Qarın AES salýǵa qatysy referendýmda elordadaǵy №164 daýys berý ýchaskesinde óz tańdaýyn jasady.
Premer-mınıstr Oljas Bektenov Astana qalasyndaǵy Oqýshylar saraıynda ornalasqan №61 ýchaskege kelip daýys berdi.
Osyǵan deıin Almaty ákimi Erbolat Dosaevtyń jubaıymen birge daýys berý ornyna kelgeni týraly jazǵan edik.
Ózderiniń konstıtýtsııalyq quqyǵyn Koreıa Respýblıkasyndaǵy Qazaqstan azamattary alǵashqylardyń biri bolyp júzege asyrdy.
Sondaı-aq, Beıjińdegi Qazaqstan Respýblıkasynyń Elshiligi men Shanhaı jáne Gonkongtaǵy Qazaqstannyń bas konsýldyqtarynda Atom elektr stansasyn (AES) salý jónindegi respýblıkalyq referendýmǵa daýys berý pýnktteri ashyldy.
Ózbekstan astanasynda ornalasqan Qazaqstan elshiliginiń janyndaǵy referendým ýchaskesi jergilikti ýaqyt boıynsha saǵat 07:00-de óz jumysyn bastady.
