Erevanda Abaı Qunanbaıuly atyndaǵy saıabaq ashyldy
ASTANA. KAZINFORM – Armenııada ótip jatqan Qazaqstannyń mádenı kúnderi aıasynda Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti. Bul týraly Mádenıet jáne aqparat mınıstrliginiń baspasóz qyzmeti habarlady.
Aıtýly oqıǵa Memleket basshysy Qasym-Jomart Toqaevtyń Erevanǵa jasaǵan resmı sapary barysynda qol jetkizilgen memleketter basshylary arasyndaǵy kelisim nátıjesinde júzege asty.
Saltanatty is-sharaǵa Qazaqstan Respýblıkasynyń resmı delegatsııasyn bastap barǵan Mádenıet jáne aqparat mınıstri Aıda Balaeva, Armenııa Respýblıkasynyń Bilim, ǵylym, mádenıet jáne sport mınıstri Janna Andreasıan, Erevan qalasy meriniń birinshi orynbasary Armen Pambýhchıan, Qazaqstan Respýblıkasynyń Armenııa Respýblıkasyndaǵy Tótenshe jáne ókiletti elshisi Bolat Imanbaev, sondaı-aq qos eldiń zııaly qaýym ókilderi, jergilikti turǵyndar men armıan astanasynyń qonaqtary qatysty.
Saıabaqtyń ashylý saltanatynda qysqasha sóz sóılegen Aıda Balaeva Armenııa bıligine jáne jobanyń júzege asýyna atsalysqan barlyq azamattarǵa alǵysyn bildirdi. Mınıstr bul oqıǵanyń eki el arasyndaǵy mádenı yntymaqtastyqtyń jańa kezeńin bildiretinin atap ótti.
— Biz búgin tarıhı oqıǵanyń kýási bolyp otyrmyz. Armenııa astanasynda qazaqtyń uly aqyny ári oıshyly Abaı Qunanbaıulyna arnalǵan saıabaq ashyldy. Qazaqstan Respýblıkasynyń Prezıdenti Qasym-Jomart Toqaev Armenııa Respýblıkasyna resmı sapary aıasynda Astana qalasyndaǵy bir kóshege armıan álipbıiniń negizin qalaýshy Mesrop Mashtots esimin berý týraly ekijaqty kelisim jasalǵany belgili. Búgin biz sol kelisimniń, dostyq pen tyǵyz mádenı baılanystardyń aıqyn kórinisine aınalǵanyn kórip otyrmyz, — dedi Mádenıet jáne aqparat mınıstri.
Saltanatty is-shara aıasynda Qazaqstan men Armenııa mınıstrleri eki el arasyndaǵy mádenı baılanystardyń tamyry tereńdep, bolashaqta odan ári nyǵaıa túsetininiń nyshany retinde saıabaqqa aǵash otyrǵyzdy.
Aıta keteıik, Abaıǵa arnalǵan eskertkishter, bıýstter men memorıaldyq taqtalar álemniń ondaǵan elinde — Bosnııa jáne Gertsegovına, Germanııa, Grýzııa, Iran, Koreıa, Qytaı, Qyrǵyzstan, Vengrııa, Egıpet, Ózbekstan, Rýmynııa, Túrkııa, Túrikmenstan, Frantsııa, Shveıtsarııa jáne Tatarstanda (Reseı) ornatylǵan.
Merekelik is-shara sońy Abaı Qunanbaıulynyń «Segiz aıaq» shyǵarmasyn oryndaǵan Qazaqstannyń dombyrashylar ansambli men Avan Mádenıet úıiniń jas ónerpazdarynyń kontsertimen jalǵasty. Sonymen qatar qonaqtar qazaq halqynyń ulttyq mádenıetimen, zamanaýı ádebıetimen jáne dástúrli taǵamdarymen tanysty.
Búgin mınıstr Aıda Balaeva bastaǵan qazaqstandyq delegatsııa Mesrop Mashtots atyndaǵy kóne qoljazbalar ǵylymı-zertteý ınstıtýty — Matenadaranǵa baryp, armıan halqynyń ejelgi jazba murasymen, onyń ishinde armıan álipbıiniń negizin qalaýshynyń qoltańbasy bar delinetin manýskrıpttermen tanysty.
Mádenı kúnder búgin Erevan qalasyndaǵy Aram Hachatýrıan atyndaǵy ortalyq kontsert zalynda ótetin gala-kontsertpen qorytyndylanady.
Aıta ketelik Armenııada 100-den asa qazaqstandyq kásiporyn turaqty jumys isteıdi.