Erdoǵan oppozıtsııa lıderi Ozeldi sotqa berdi

ASTANA.KAZINFORM — Túrkııa prezıdenti Rejep Taıyp Erdoǵan oppozıtsııalyq Respýblıkalyq halyq partııasynyń (CHP) jetekshisi Ozgýr Ozelden 1 mıllıon túrik lırasy (shamamen 25 myń dollar) óndirý týraly sotqa shaǵym túsirdi, dep habarlaıdy Kazinform tilshisi. 

Erdoǵan Ozeldi 13 tamyz kúni Baırampashadaǵy mıtıngide jáne Marmara túrmesinde jasaǵan málimdemesinde «qorlaıtyn» ári «negizsiz aıyptaýlar» jasady dep aıyptady.

Bul týraly Erdoǵannyń advokaty Hýseın Aıdyn málimdep, talap aryz Ankaranyń bas sotyna jiberilgenin, al Ankara prokýratýrasyna «prezıdentti qorlaý» baby boıynsha jeke qylmystyq is qozǵalǵanyn basa aıtty.

— Prezıdentimizge qatysty orynsyz sózder men negizsiz aıyptaýlarǵa baılanysty 1 mıllıon túrik lırasy úshin azamattyq is qozǵaldy. Sonymen qatar, bas prokýratýraǵa prezıdentke til tıgizý faktisi boıynsha shaǵym túsirildi, — dedi Aıdyn.

Erdoǵannyń reaktsııasyn týdyrǵan Ozeldiń sózderi saıası tutqyndardy qoldaý maqsatynda uıymdastyrylǵan mıtıngide jáne Marmara túrmesine barǵannan keıin jasaldy. Olarda QPP jetekshisi, prezıdent advokattarynyń aıtýynsha, «qorlaıtyn» jáne «jalǵan aıyptaýlar» jasaǵan.

Prezıdent Erdoǵan men oppozıtsııa ókilderi arasynda alǵash ret quqyqtyq daý týyp otyrǵan joq. Jıyndar men baspasóz máslıhattary kezinde aıtylǵan saıası pikirler men málimdemeler memleket basshysyn qorlaý baptary boıynsha sotqa shaǵymdanýǵa jıi sebep bolady.

Buǵan deıin Erdoǵannyń túrik oppozıtsııasynyń basshysyn qorlady dep sotqa bergeni týraly jazǵan bolatynbyz.