VI Islam yntymaqtastyǵy oıyndarynda Qazaqstan atynan 98 sportshy óner kóretedi
ASTANA. KAZINFORM - Saýd Arabııasynyń astanasy Er-Rııad qalasynda VI Islam yntymaqtastyǵy oıyndary bastaldy.
QR Týrızm jáne sport mınıstrligi baspasóz qyzmetiniń habarlaýynsha, is-sharanyń ashylý saltanatynyń sherýi Korol Abdýlazız atyndaǵy sporttyq ashyq alańda uıymdastyryldy.
Qazaqstan sportshylar delegatsııasynyń tý ustaýshylary – dzıýdodan Qazaqstan chempıony, Azııa kýbogynyń jeńimpazy Arýna Jangeldına jáne aýyr atletıkadan Álem, Azııa chempıony Nurǵısa Ádiletuly.
Arýna Jangeldına – 1999 jyly 17 qyrkúıekte Aqtóbe qalasynda týǵan. Dzıýdo boıynsha Qazaqstan Respýblıkasynyń sport sheberi, -78 kg salmaq dárejesinde óner kórsetedi. Ol 2022 jyly Astanada ótken Azııa chempıonatynyń qola júldegeri, 2024 jyly Aqtaýda Azııa kýbogynyń chempıony atandy. Sondaı-aq Qazaqstan chempıonattarynda tórt dúrkin jeńimpaz (Oral 2021, Atyraý 2022, Astana 2023, Aqtóbe 2024).
Nurǵısa Ádiletuly – 2000 jyly 9 qazanda Túrkistan oblysynda dúnıege kelgen. Qazaqstannyń eńbek sińirgen sport sheberi, aýyr atletıkadan -96 kg salmaq dárejesinde el namysyn qorǵaıdy. Ol 2022 jyly Kolýmbııanyń Bogota qalasynda ótken Álem chempıonatynyń kúmis júldegeri, 2023 jyly Ońtústik Koreıada Azııa chempıony jáne 2024 jyly Bahreınde ótken Álem chempıonatynyń jeńimpazy.
Aıta keteıik, bıylǵy dodaǵa álemniń 57 elinen 3000-nan astam sportshy qatysady. Qazaqstan quramasynan 15 sport túrinen 98 sportshy baq synaıdy. VI Islam yntymaqtastyǵy oıyndary 7–21 qarasha aralyǵynda ótedi.
Osyǵan deıin VI Islam yntymaqtastyǵy oıyndarynyń Memlekettik tý kóterý rásimi ótkeni týraly jazdyq.