Endi drondar men JI zańsyz qurylys nysandaryn anyqtaıdy
ASTANA. KAZINFORM — Memleket salynyp jatqan qurylys nysandaryn bekitilgen bas josparmen salystyryp, tekserý úshin drondar men JI algorıtmderin qoldanbaq. «Qaǵaz haosynan» tsıfrlyq baqylaýǵa kóshý týraly ónerkásip jáne qurylys vıtse-mınıstri Jánnat Dúbirova aıtyp berdi.
Onyń aıtýynsha, negizgi tsıfrlyq jobalardyń biri — Memlekettik qala qurylysy kadastrynyń avtomattandyrylǵan aqparattyq júıesi. Bul qural zańsyz tyǵyz qurylysqa jol bermeı, bas jospardan ınjenerlik jelilerge deıingi qala qurylysy týraly aqparatty ashyq ári túsinikti etedi jáne jer ýchaskelerin berýdiń tolyq ashyq bolýyna kómektesedi.
— Osy jyldyń tórtinshi toqsanynda biz birqatar pılottyq memlekettik qyzmetterdi — bastapqy jobalaý derekterin berýden bastap aldyn ala jobalardy úılestirýge jáne tehnıkalyq sıpattamalardy berýge deıin iske qosýdy josparlap otyrmyz. Qazirgi ýaqytta júıe tolyq ónerkásiptik paıdalanýǵa berilý úshin daıyndalý satysynda, — dedi Jánnat Dúbirova elordada Kongress ortalyqta.
Odan bólek, kelesi jyldyń basynda tsıfrlyq bas josparlar men egjeı-tegjeıli josparlaý jobalarynyń oryndalýyn avtomatty túrde baqylaý úshin AI-Co-pilot júıesin pılottyq rejımde engizý josparlanyp otyr. Drondar men jasandy ıntellekt algorıtmderin qoldana otyryp, naqty qurylys bekitilgen qujattamamen salystyrylady jáne anyqtalǵan kez kelgen buzýshylyqtar týraly Memlekettik sáýlet-qurylys ınspektsııasyna habarlanyp otyrady.
Buǵan deıin ónerkásip jáne qurylys vıtse-mınıstri Qýandyq Qajkenov áleýmettik osal toptarǵa baspana alýda qandaı qoldaý kórsetilgenin aıtyp berdi.
Sonymen birge, 2026 jyldyń basynda Qazaqstanda josparlaý men jobalaýdan bastap paıdalanýǵa berýge deıingi qurylys obektilerin súıemeldeıtin biryńǵaı portal iske qosylady.