Eń júırik tazylar Almatyda
ASTANA. KAZINFORM — Elordada shyrǵa tartý boıynsha ótken «Tazy Gran-Prı» baıqaýy máresine jetti, dep habarlaıdy Kazinform tilshisi.
Baıqaýǵa 300-den astam úmitkerdiń arasynan tańdap alynǵan 69 tazy qatysty. Elimizdiń 17 óńirinen kelgen tazylardyń kóbi buǵan deıin birtalaı dodalarda top jaryp júrgen belgili qatysýshylar. Arasynda endi ǵana kópshilik kózaıymyna aınalyp kele jatqan jas tazylar da bar.
Jarysta arlandar men qanshyqtar jeke-jeke básekege tústi. 1 shaqyrymda shyrǵa tartýdan jarysqan 70-ke jýyq tazy aldymen 12 topta ózara baq synady. Ár topta úzdik atanǵan 6 arlan men 6 qanshyq fınalǵa joldama aldy.
Aqtyq básekede úzdik úshtik anyqtaldy. Qatysýshylardyń arasynda ásirese almatylyq tazylar erekshe kózge tústi.
Arlandar arasyndaǵy júldegerler:
І oryn — Syldyr (Almaty qalasy)
ІІ oryn — Surkıik (Astana qalasy)
ІІІ oryn — Qaraqus (Almaty qalasy)
Qanshyqtar arasyndaǵy júldegerler:
І oryn — Suńqar (Almaty qalasy)
ІІ oryn — Erke qyz (Qaraǵandy qalasy)
ІІІ oryn — Aısary (Qaraǵandy qalasy)
Dástúrli dodada oza shaýyp, úzdik atanǵan tazylardyń ıelerine 750 myń teńge syıaqy berildi. Ekinshi bolyp kelgenderge 500 myń, ІІІ oryn alǵan tazynyń ıelerine 250 myń teńge tabystaldy.
Eske sala keteıik, buǵan deıin baıqaýdyń jalpy júlde qory 3 mln teńge ekenin jazǵan edik.
