Emmanıýel Makron X paraqshasynda qazaqsha post jazdy
Keshe 1 qarashada Qazaqstanǵa resmı saparmen kelgen Frantsııa Prezıdenti Emmanıýel Makron X (burynǵy Twitter) jelisinde qazaqsha post jazdy, dep habarlaıdy Kazinform.
«Іri derjavalar ústemdikke qaıta umtylǵan, al keıbirinen boljaýǵa bolmaıtyn áreket kútken álemde jańa perspektıvalardy ortaq etýge jáne birge qurýǵa bolatyn seriktester men dostarǵa sene alý óte baǵaly. Qazaqstan men Frantsııa solardyń qataryna kiredi», - delingen Frantsııa Prezıdentiniń jazbasynda.
Іri derjavalar ústemdikke qaıta umtylǵan, al keıbirinen boljaýǵa bolmaıtyn áreket kútken álemde jańa perspektıvalardy ortaq etýge jáne birge qurýǵa bolatyn seriktester men dostarǵa sene alý óte baǵaly.
— Emmanuel Macron (@EmmanuelMacron) November 1, 2023
Qazaqstan men Frantsııa solardyń qataryna kiredi. pic.twitter.com/09NoSlSjZX
Eske salaıyq, 1 qarashada Frantsııa Prezıdenti Emmanıýel Makron resmı saparmen Qazaqstanǵa keldi. Qasym-Jomart Toqaev Aqordada Frantsııa Prezıdenti Emmanıýel Makrondy qarsy aldy.
Qazaqstan men Frantsııa prezıdentteri shaǵyn quramda kelissóz júrgizdi.
Makron bul sapar ekijaqty seriktestik úshin mańyzdy jylmen tuspa-tus kelip otyrǵanyn aıtty. Qazaqstan Prezıdenti Frantsııa — Qazaqstannyń Eýropadaǵy óte mańyzdy seriktesi ekenin atap ótti.
Sondaı-aq, Prezıdent kezdesý kezinde bilim jáne ǵylym salasyndaǵy jobalardy qolǵa alýǵa erekshe kóńil bólingenin jetkizdi.
Emmanıýel Makronnyń aıtýynsha, qazaq mektepterine frantsýz tilin oqytý tájirıbesi qaıta oralǵany mańyzdy.
Memleket basshysy Qasym-Jomart Toqaev álemdegi túrli saıası shıelenister men ekonomıkalyq daǵdarystar eldi alańdatyp otyrǵanyna toqtaldy.
