Emhanalardyń reıtıngin patsıentter anyqtaıdy

ASTANA. QazAqparat -  Medıtsınalyq saqtandyrý qory patsıentter úshin medıtsınalyq qyzmetti baǵalaıtyn mobıldi qosymsha ázirlendi, dep habarlaıdy elorda ákimdiginiń medıa ortalyǵy . 

Smartfondar men gadjetter qoldanýshylaryna arnalǵan «MSQ: Halyqtyq baqylaý» qosymshasy 6 qarashada iske qosyldy. Qosymshanyń kómegimen qazaqstandyqtar emhanalar men statsıonarlar qyzmetin qabyldaýǵa ketken ýaqyt, servıs deńgeıi, dáriger bergen em-domnyń durystyǵy men túsiniktiligi, qyzmet kórsetýge jasalǵan jaǵdaılar syndy ártúrli ólshemder boıynsha baǵalaı alady.

Astana qalasy boıynsha «ÁMSQ» kommertsııalyq emes aktsıonerlik qoǵamy fılıalynyń dırektory Nurlybek Qabdyqaparovtyń aıtýynsha, Astana qalasyndaǵy emdeý uıymdarynyń patsıentteri qosymsha arqyly engizgen pikirlerdiń neigizinde emhanalardyń reıtıngi jasalmaq.

«ÁMSQ potentsıaldy qyzmet kórsetýshiler derekqoryna engen Astana qalasyndaǵy emdeý uıymdarynyń patsıentteri óz pikirlerin qosymsha arqyly bildire alady. Bul pikirlerdiń negizinde emhanalardyń reıtıngi jasalatyn bolady. Medıtsınalyq uıymdardyń reıtıngi paıdalanýshylar qoıǵan baǵa negizinde avtomatty túrde jasalady. Bolashaqta bul reıtıng azamattarǵa eń úzdik qyzmet kórsetetin emdeý mekemesin tandaýǵa múmkindik beredi», - deıdi «ÁMSQ» KEAQ-nyń Astana qalasy boıynsha fılıalynyń dırektory.

Qordyń IT strategııa jáne táýekelderdi basqarý jónindegi basqarýshy dırektory Abaı Dúısenevtyń atap ótýinshe, aldaǵy ýaqytta jańa fýnktsııalarmen jáne servıs túrlerimen tolyqtyrylady dep josparlanýda.

«Qosymshanyń kómegimen jedel túrde keri baılanys ornatylyp, azamattardyń qyzmet kórsetetin emhanany tańdaý protsesi jeńildeı túsedi.Oı-pikirler men reıtıngtiń negizinde qala turǵyndary medıtsınalyq mekeme týraly tolyqqandy aqparat alyp, durys tańdaý jasaı alady.Bolashaqta biz qosymshany jańa fýnktsııalarmen jáne servıs túrlerimen tolyqtyratyn bolamyz», - dedi Abaı Dúısenev.

Aýrýhanalar men emhanalardyń qyzmetin baǵalaýdyń eshqandaı qıyndyǵy joq. Qosymshany paıdalaný úshin, eń aldymen, júıede tirkelý qajet. Ol úshin paıdalanýshy óziniń JSN, telefon nómiri men aımaǵyn kórsetýi tıis. Budan keıin paıdalanýshy medıtsınalyq uıymdardyń tiziminen qajetti mekemeni tańdap, bes baldyq baǵalaý shkalasy boıynsha baǵasyn qaldyra alady.

Qosymsha Android platformasyna negizdelgen smartfondarǵa Playmarket arqyly, al, iOS platformasy úshin AppStore arqyly júkteledi.