Elordada jeńil atletıkadan ashyq chempıonat bastaldy
Búgin Qazaqstan jeńil atletıka kesheninde Táýelsizdiktiń 30 jyldyǵy aıasynda Nur-Sultan qalasynyń eresekter men jasóspirimder arasynda Nur-Sultan Open 2021 ashyq chempıonaty bastaldy.
Oǵan Mádenıet jáne sport mınıstri Aqtoty Raıymqulova, elorda ákimi, Nur-Sultan qalasy jeńil atletıka federatsııasynyń prezıdenti Altaı Kólginov qatysty.
Mınıstr elimizde jastardyń jeńil atletıkaǵa degen qyzyǵýshylyǵy joǵary ekenin atap ótti.
«Qazaqstan jeńil atletıka kesheni myń kórermenge arnalǵan, kez kelgen dárejedegi halyqaralyq jarysty, álemdik dodalardy ótkizýge bolady. Ózderińiz biletindeı, jeńil atletıka sporttyń keń taraǵan túri. Búgingi tańda, Qazaqstan jeńil atletteri Olımpıada, álem chempıonaty men halyqaralyq jarystarda joǵary nátıje kórsetip jatyr. Bul sport túrinen Olımpııa oıyndarynda alǵashqy altyndy 2000 jyly Sıdneıde (Aýstralııa) Olga Shıshıgına ıelendi. Sonymen qatar Dmıtrıı Karpov, Olga Rypakova sekildi álem moıyndaǵan sportshylarymyz bar.
Aldaǵy ýaqytta da elimizdiń atyn tanytatyn jas sportshylar kóptep shyǵady degen úmittemiz. Táýelsizdik rýhymen ósip kele jatqan búgingi jas býyn – bizdiń erteńgi úmitimiz, senimdi tiregimiz. Barshańyzdy, jeńil atletıka keshininiń saltanatty ashylýymen shyn júrekten quttyqtaımyn! Jarysqa qatysýshylarǵa sáttilik tileımin», - dedi Aqtoty Raıymqulova.
Ashyq chempıonat jeńil atletıkanyń 5 túrinen (ıadro laqtyrý, 4*200 metrge aralas estafeta, uzyndyqqa sekirý, júgirý jáne jeńil atletıkalyq júris) ótip jatyr. Jarysqa SQO, Qaraǵandy, Aqmola, Qostanaı oblysy men Shymkent, Nur-Sultan qalasynan kelgen 150-den astam sportshy qatysyp jatyr.
