Elordada jas otbasylar arasynda baıqaý ótedi

ASTANA. QazAqparat – Astana qalasy jastar saıasaty máseleleri basqarmasynyń basshysy Qaırat Qambarov jas otbasylarǵa arnalǵan jobalar men aldaǵy ýaqytqa arnalǵan josparyn bólisti, dep habarlaıdy QazAqparat tilshisi.

«Jas otbasylardy qoldaý jáne olardy kópshilikke úlgi etý maqsatynda byltyr «Úzdik jas otbasy» baıqaýy uıymdastyryldy. Baıqaý 3 kezeńnen turdy. Atap aıtqanda, shyǵarmashylyq jarystar, zııatkerlik oıyndar (vıktorına) jáne qatysýshylardyń beıne vızıtkasy. Іrikteý nátıjesinde fınalǵa 10 otbasy ótti. Baıqaý qorytyndysy boıynsha jeńimpaz otbasylarǵa turmystyq tehnıka jáne elektronıka satyp alý sertıfıkattary tabystaldy», - dedi Qaırat Qambarov Astana qalasynyń kommýnıkatsııalar qyzmetinde ótken brıfıngide.

Basqarma basshysynyń málimdeýinshe, otbasylyq qundylyqtardy nasıhattaý baǵytyna erekshe mán berilip, kóptegen joba júzege asyp jatyr.

«Júkti áıelderge arnalǵan trenıngter uıymdastyryldy. Dáris barysynda júkti áıeldiń denesindegi fızıologııalyq ózgerister, júktilik kezinde durys tamaqtaný, taǵy sol sııaqty taqyryptar qozǵaldy. Trenıng sala mamandary men sarapshylardyń qatysýymen ótti», - deıdi ol.

Sondaı-aq, spıker astanalyq jas otbasylarǵa arnalǵan keshendi jobalar bıyl da jalǵasyn tabatynyn aıtty.

Aıtýynsha, keshendi is-shara 5 baǵyttan turady:

- Jas erli-zaıyptylarǵa otbasylyq qundylyqtardy túsindirý boıynsha semınarlar, trenıngter uıymdastyrý;

- «Úzdik jas otbasy» baıqaýyn ótkizý;

- Jas otbasylar arasynda salaýatty ómir saltyn nasıhattaýǵa baǵyttalǵan «Kóńildi start» otbasylyq estafetasyn uıymdastyrý;

- Otbasylyq zııatkerlik týrnır ótkizý;

- Áleýmettik jelilerde otbasylyq baıqaý jarııalaý.