Elordada taksı qyzmeti reformalanady

NUR-SULTAN. QazAqparat - Elordada taksı qyzmeti reformalanyp jatyr. Nur-Sultan qalasy máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııasynyń otyrysynda osy másele talqylandy, dep habarlaıdy QazAqparat tilshisi.

Jıynda qalalyq máslıhat hatshysy Erlan Kanalımov qalalyq taksı qyzmetin odan ári damytý týraly suraq qoıdy.

«Kelesi jyly bizde «Sergek» jáne kólik qyzmetin kórsetý jobasy aıaqtalady. Jobalar ózin-ózi aqtap, baǵyty durys ekenin kórdik. Endigi taǵdyry ne bolady? Memleket-jekemenshik áriptestigi aıasynda jasalǵan kelisimsharttar aıaqtalady. Sonda nysandardy kim teńgerimge alady? Olarǵa kim qyzmet kórsetedi?», - dep surady ol.

Tıisti basqarma ókilderi taksı qyzmetimen baılanysty birqatar problemalar bar ekenin atady.

«Birinshi kezekte, taksıdiń sylbyrlyǵyn synaýshylar kóp. Ekinshi kezekte servısti damytý, úshinshi kezekte avtoparkti jańartý qajet. Biz osy kásip ókilderimen sóılestik. Ózara túsinistik bar jáne bıyl biz tarıfterdi qaıta bekittik. Kelesi jyly saralanǵan tarıfti engizgimiz keledi. Sonda olar belgili bir shyǵyndaryn jaba alatyn bolady. Qazir kólik basqarmasymen birge reformalaý jáne brend engizý máseleleri pysyqtalyp jatyr», - dedi ákimdik ókilderi.