Elordada saýda ornynyń quny qansha
«Kóshe saýdasyna arnalǵan 1000 oryn» jobasy Astana qalalyq ákimdigi, ulttyq kásipkerler palatasy jáne basqa da tıisti memlekettik organdardyń qatysýymen bekitildi. Jobaǵa óz kásibin damytqysy keletin kez kelgen adam qatysa alady. Ol úshin eń aldymen jeke kásipker nemese zańdy tulǵa retinde tirkelýi tıis. Onymen qosa, bankten esep-shot ashýy qajet. Odan keıin jeke kýáligi men Salyq komıtetinen qaryzynyń bar-joǵy týraly anyqtama suralady. Osy jáne ózge de tıisti qujatty tapsyrǵan soń kásipker ózine yńǵaıly jerdi alýyna múmkindigi bar. Eger ol jerdi basqa da úmitkerler alǵysy kelse, kásipkerler arasynda konkýrs ótkiziledi.
«Konkýrsqa qatysýshynyń qaryzy bolsa, onda qatysý múmkindigi shekteledi. Sonymen qatar, komıssııa úmitkerlerdiń qujattaryna, ondaǵy usynylǵan qyzmet túriniń bastaǵaly otyrǵan jumysyna sáıkes kelýin qaraıdy. Al eger bir orynǵa úmitti kásipker 4 nemese odan da kóp bolsa, onda ol jer aýktsıonǵa shyǵarylady» -dedi «Astana» áleýmettik-kásipkerlik korporatsııasy AQ Basqarma tóraǵasy Nurlan Jaqypov.
Sonymen qatar, aýktsıonnyń ózindik ótkizý erejesi bar ekeni aıtyldy.
«Eger bir jerge 20-30 kásipker talasyp otyrsa, komıssııanyń sheshim qabyldaýy qıyn. Sondyqtan, aýktsıon ótkiziledi. Al aýktsıon arqyly úlestiriletin oryndar kásipkerlerdiń sol jerden qansha tabys tabýdy josparlap otyrǵanyna baılanysty bolady», - dedi N.Jaqypov.
Aıta keteıik, «Kóshe saýdasyna arnalǵan 1000 oryn» jobasy 2016 jyldan beri júzege asyrylyp keledi. Búginde qala boıynsha 630 oryn jalǵa berildi. Onyń ishinde 228-i - kókónis pen jemis-jıdek, 208 - fast-fýd, 75 - azyq-túlik, 50 - gúl, 11 - gazet-jýrnal, 2 - kádesyı satatyn saýda núkteleri bar.
