Elordada LRT-ǵa qatysty qaǵıdalar bekitildi
ASTANA. KAZINFORM – Astana qalasy ákimdiginiń qaýlysy «Qazaqstan Respýblıkasyndaǵy kólik týraly» jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańdaryna sáıkes qabyldandy.
Qujatqa sáıkes, qalalyq relsti kólikpen (metropolıten, tramvaı, jeńil relsti kólik jáne monorels) jolaýshylardy tasymaldaý belgilengen baǵyttar boıynsha júzege asyrylady. Jolaýshylar kólik qyzmetin paıdalaný úshin mindetti túrde jol júrý qujatyn (bılet) satyp alýy tıis.
Qaǵıdalarda bılet berý, jol júrý aqysyn tóleý tártibi, sondaı-aq jolaýshylarǵa aqparat berý talaptary aıqyndalǵan. Sonymen qatar tasymaldaýshy jolaýshylardyń qaýipsizdigin qamtamasyz etý maqsatynda qol júgin tekserýge quqyly.
Qujatta jolaýshylardyń quqyqtary men mindetteri de naqtylanǵan. Atap aıtqanda, jolaýshylar bılet satyp alyp, belgilengen tártipti saqtaýǵa, jol júrý qujatyn sapar sońyna deıin saqtaýǵa mindetti. Al 7 jasqa deıingi bir balany tegin alyp júrýge múmkindik beriledi.
Sonymen qatar qoǵamdyq tártipti buzý, bıletsiz kirý, qozǵalys kezinde kólikke miný nemese túsý, qaýipti zattardy alyp júrý jáne kólik múlkin búldirý sekildi áreketterge tyıym salynady.
Qaýlynyń oryndalýyn baqylaý qala ákiminiń jetekshilik etetin orynbasaryna júkteldi. Qujat 2026 jyldyń 12 sáýirinde qoldanysqa engiziledi.
Tolyq aqparatty silteme arqyly qalalyq relsti kólikte jolaýshylardy tasymaldaý tártibi, quqyqtary men mindetteri, sondaı-aq engizilgen shekteýler men talaptar týraly oqı alasyz.
Buǵan deıin Astana LRT-nyń jolaqysy qansha bolatynyn jazǵanbyz.
Sonymen qatar Elordada jeńil relsti kólik (LRT) jobasyn iske asyrýdyń kelesi kezeńi bastaldy. Shyńǵys Aıtmatov kóshesinde LRT jelisiniń ekinshi kezegin salý aıasynda daıyndyq jumystary qolǵa alyndy.