Elordada qaryzyn tólemegen 44 boryshker qamaýǵa alyndy
ASTANA. KAZINFORM - Bıyl elordada qaryzyn tólemegen 389 boryshker jaýapqa tartyldy. Astanadaǵy Ádilet departamenti basshysynyń orynbasary Azamat Aınabekov Kommýnıkatsııalar qyzmetinde ótken brıfıngide memleket paıdasyna qaryzdardy óndirip alý jáne boryshkerlerdi jaýapkershilikke tartý jónindegi jumys týraly aıtyp berdi, dep habarlaıdy qala ákimdiginiń resmı saıty.
Spıkerdiń aıtýynsha, Ádilet departamenti qaryzdardy óndirip alýǵa ǵana emes, sonymen qatar azamattardyń óz mindettemelerin oryndaýy úshin jaǵdaı jasaýǵa da erekshe nazar aýdarady.
2024 jyly vedomstvo 151 mıllıard teńgeden astam somaǵa 962 atqarýshylyq is qozǵady. Onyń ishinde 528 is sátti aıaqtaldy, al 308 atqarý qujattary boıynsha qaryzdar jalpy somasy 43,8 mıllıard teńgege tolyq óndirildi.
«Qazirgi ýaqytta sot oryndaýshylarynyń is júrgizýinde 33,7 mıllıard teńge somasyna 438 is bar. Onyń ishinde 132 is boryshkerlerdiń jalaqysynan aı saıynǵy bereshekti ustap qalý satysynda tur. 38 jaǵdaıda boryshkerlerdi izdeýge jarııalaý saldarynan oryndaý toqtatyldy. Atqarýshylyq qujattardyń oryndalmaýy Qazaqstan Respýblıkasynyń zańnamasyn eleýli buzý retinde qarastyrylady, bul ákimshilik jaýapkershilikke ákep soǵýy múmkin», - dep atap ótti Azamat Aınabekov.
Máselen, osy jyldyń basynan bastap 408 ákimshilik hattama jasaldy, onyń ishinde 389 boryshker jaýapqa tartyldy. Eń jıi qoldanylatyn sanktsııalarǵa 345 boryshkerge áser etken 5-ten 40 aılyq eseptik kórsetkishke (AEK) deıingi aıyppuldar, sondaı-aq 44 boryshkerge qoldanylǵan 2-den 5 táýlikke deıingi ákimshilik qamaýǵa alý kiredi.
Sonymen qatar sot oryndaýshylary ákimshilik quqyq buzýshylyq týraly kodekstiń birqatar baby boıynsha ákimshilik hattamalar jasaýǵa quqyly.
«Qaryzdardy óndirip alýdyń tıimdiligin arttyrý úshin Astana qalasynyń Ádilet departamenti keshendi tásildi engizýde. Osy tásil aıasynda polıtsııa departamenti men jeke sot oryndaýshylarynyń qatysýymen birlesken reıdter júrgiziledi, olardyń barysynda boryshkerlerge mindettemelerdi oryndamaýdyń saldary týraly habarlamalar men eskertýler beriledi. Sonymen qatar, jumyssyz boryshkerler úshin azamattarǵa jumysqa ornalasýǵa jáne qaryzdaryn óteýdi qolǵa alýǵa kómektesý maqsatynda aı saıyn Bos jumys oryndary jármeńkeleri uıymdastyrylady. Jármeńkeler týraly aqparat departamenttiń resmı saıtynda jarııalanady», - dedi spıker.