Elordada elektrli velosıpedter sany artady

ASTANA. KAZINFORM — Astanada qoǵamdyq velojaldaý júıesi jańǵyrtylady, dep habarlaıdy elorda ákimdiginiń resmı saıty.

Astana qalasynda veloınfraqurylymdy aýqymdy jańartý josparlanyp otyr. Joba qoǵamdyq velojaldaý qyzmetteriniń sapasy men qoljetimdiligin arttyrýǵa baǵyttalǵan.

— Jańǵyrtý aıasynda 1300 elektrli velosıped, sondaı-aq jelini 195 velostansaǵa deıin keńeıtý kózdelgen. Velosherıng júıesi elordada 2014 jyldan beri jumys istep keledi jáne qalalyq kólik ınfraqurylymynyń bir bóligine aınaldy. Qazir velojoldaý júıesinde 155 stansa jáne shamamen 750 velosıped bar, — delingen habarlamada.

Jańartý jabdyqtardyń tozýymen jáne júıe jumysynyń tıimdiligin arttyrý qajettiligimen baılanysty.

Jobany iske asyrý servıs senimdiligin arttyrýǵa, qamtýdy keńeıtýge jáne elorda turǵyndary men qonaqtaryna zamanaýı ári ekologııalyq taza kólik túrin usynýǵa múmkindik beredi.

Budan buryn Astanadaǵy 17 parkıng jeke menshikke satylatyny aıtyldy.