Elordada «Batyrlarǵa alǵys!» aktsııasy bastaldy
«Eń aldymen barshańyzdy 1 naýryz – Alǵys aıtý kúnimen shyn júrekten qutyqtaımyn! Búgin aýdanymyzdaǵy «Qutqarýshylar» alańyna jınalýymyzdyń sebebi – el ıgiligi jolynda kásibı mindetin buljytpaı oryndap, qyzmet babynda qaısarlyq pen ójettik kórsetip kele jatqan qutqarý salasynyń qyzmetkerlerine Alǵys aıtyp, janqııar erlikterine qurmet kórsetý. Qyzmet barysynda jan tapsyrǵan maıtalmandarymyzdyń rýhyna taǵzym etý», - dedi is-shara barysynda Baıqońyr aýdanynyń ákimi Erlan Jaýlybaev.
Onyń atap ótýinshe, adam ómirin túrli apattar men qaýip-qaterlerden saqtaýda, tótenshe oqıǵanyń aldyn alýda aıanbaı eńbek etip, qyraǵylyq tanytyp júrgen batyr azamattarǵa halyqtyń aıtar alǵysy men rızashylyǵy qashan da zor. Tótenshe jaǵdaıǵa tosqaýyl qoıyp, turǵyndar ómirin qutqarýda eren eńbek sińirip júrgen ár qyzmetkerdiń jumysy – erlikpen para-par.
«Elimizdegi sońǵy jyldary oryn alǵan tabıǵı apattarda ár óńirde qyzmet atqaratyn Tótenshe jaǵdaılar qyzmetkerleri bir judyryq bolyp jumylyp, ózderiniń mindetterin aıqyn erlikpen atqarǵanyna barshamyz kýámiz. Shyn máninde, bul – naǵyz erjúrek azamattardyń qyzmeti. Basqa adamdardyń ómirine arasha túsip, qaza tapqan qutqarýshylar az emes. Olardyń qatarynda elordalyq Asqar Zabıkýlın de bar. «Er esimi – el esinde». Batyrlardyń erligi eshqashan umytylmaýǵa tıis. Budan bólek, jaqynda Túrkııada joıqyn jer silkinisi bolǵanyn bilesizder. Baýyrlas Túrkııa eline elimizden qutqarýshylar jáne dárigerler jiberildi. Bizdiń qutqarýshylar birneshe adamdy aman alyp shyqty. Túrkııada kúndiz-túni qyzmet etken azamattarymyzǵa Alǵys aıtamyz! Sizderdiń beıbit kúndegi batyrlyqtaryńyz jas urpaqty eljandylyq pen batyldyqqa tárbıelep, jaýyngerlik rýh, patrıottyq sezimderin qalyptastyrady», - dedi ol.
Al jedel qutqarý otrıadynyń bas qutqarýshysy Janat Qaımerdenov ujymynda óz isine naǵyz berilgen adamdardyń jumys isteıtindigin basa aıtty.
«Bul bizdiń jumysymyz ári mamandyqty ózimiz tańdadyq. Kez kelgen adam bul jumysqa kele bermeıdi. Árıne, bireýlerdiń kóńilnen jalaqy kólemi shyqpaıdy, endi biri psıhologııalyq turǵyda shydaı almaıdy. Kópshiligimiz qulshynyspen jumys isteımiz. Óıtkeni, adam ómirin eshqandaı aqshamen ólshenbeıdi», - dedi Janat Qaımerdenov BAÓ ókilderine bergen suhbatynda.
