Elordada ASTANA TRIATHLON half týrnıri ótedi
ASTANA. KAZINFORM – Astananyń Ortalyq saıabaǵynda 13 shilde kúni aýqymdy sporttyq shara – ASTANA TRIATHLON half týrnıri ótedi, dep habarlaıdy elorda ákimdiginiń resmı saıty.
Trıatlonǵa qatysýshylar úsh kezeńnen turatyn qashyqtyqty eńserýi tıis: júzý – 1,9 shaqyrym, velojarys – 90 shaqyrym jáne júgirý – 21,1 shaqyrym.
– Astana qalasynyń trıatlon federatsııasy elorda ákimdiginiń qoldaýymen ASTANA TRIATHLON half atty aýqymdy sporttyq sharany uıymdastyryp otyr. Bul – elordalyqtar men qala qonaqtaryna arnalǵan, sondaı-aq Qazaqstannyń ózge óńirleri men jaqyn shetelderden qatysýshylar tartylatyn jartylaı temir adam qashyqtyǵyndaǵy jarys. Qatysýshylardyń qaýipsizdigi úshin tranzıttik aımaqtar men jedel járdem kólikteriniń kezekshiligi qarastyrylǵan, - dedi Astana trıatlon federatsııasynyń bas hatshysy Janat Qojahmetov.
Trıatlondy tanymal etý jáne damytý maqsatynda jarys baǵdarlamasyna Age Group sanatyndaǵy sportshylar arasyndaǵy starttar da engizilgen. Olar HALF (polovınka) qashyqtyǵynda baq synaıdy: 1,9 km júzý, 90 km veloetap jáne 21,1 km júgirý. Age Group sanatyna kiretin erler men áıelder kelesi jas toptary boıynsha synǵa túsedi: 18-29 jas, 30-39 jas, 40-49 jas, 50-59 jas jáne 60 jastan joǵary. Sonymen qatar erler, áıelder jáne aralas quramdaǵy estafetalyq komandalar da jarys jolyna shyǵady.
Jas ereksheligi men jynysy boıynsha jeńimpazdar men júldegerlerge medaldar men dıplomdar tabystalady.
Qosymsha aqparat Astana trıatlon federatsııasynyń resmı (@astana_triathlon) paraqshasynda qoljetimdi.
Osyǵan deıin elordada Comic Con Astana-2025 festıvali bastalǵanyn habarlap edik.