Elordada alǵash ret Qazaqstan-Belarýs agrarlyq forýmy ótedi
ASTANA. KAZINFORM — Elordada KazAgro/KazFarm-2025 kórmeleri aıasynda birinshi ret Qazaqstan-Belarýs agrarlyq forýmy ótedi. Bul týraly Belarýs Respýblıkasynyń Qazaqstandaǵy Tótenshe jáne Ókiletti elshisi Alekseı Bogdanov aıtty.
— 22-24 qazan kúnderi elordada alǵash ret Qazaqstan-Belarýs agrarlyq forýmy ótedi. Bul is-shara sút jáne et sharýashylyǵy, ósimdik sharýashylyǵy salalaryn damytýmen aınalysyp júrgen barlyq agrarshy úshin paıdaly bolmaq. Úlken úsh sektsııa bolady. Birinshi sektsııa mal sharýashylyǵy men janýarlardyń veterınarlyq saýlyǵyna, ekinshisi ósimdik sharýashylyǵy men ósimdikterdiń qorǵaý máselesine, al úshinshi sektsııa mal sharýashylyǵynda da, ósimdik sharýashylyǵynda da ónim óndirý tıimdiligin qamtamasyz etetin mashınalarǵa jáne jabdyqtarǵa arnalady, — dedi elshi.
Onyń atap ótýinshe, forým aıasynda birqatar kelisimshartqa qol qoıylady. Kelisimsharttardyń boljamdy somasy 50-60 mln dollardy quramaq. Sondaı-aq ol Qazaqstannyń shıkizattan qosylǵan quny joǵary ónim alýǵa baǵyttalǵan saıasatyn joǵary baǵalady.
— Biz bir tonna shıkizattan qosylǵan quny joǵary ónim alý úshin tereń óńdeýge basa mán berip otyrmyz. Eksportymyz shıkizatqa emes «Belarýste jasalǵan» brendimen tereń óńdelgen ónimdi syrtqy naryqqa shyǵarýǵa baǵyttalǵan. Búginde Qazaqstanda dál osy saıasatty belsendi júrgizip otyr. Bul óte durys. Osy maqsatta birinshi agrarlyq forýmdy uıymdastyrmaqpyz. Dál osy saladaǵy tájirıbelerimizben, jetistikterimizben, tehnologııalarymyzben bóliskimiz keledi. Menińshe bul eki tarapqa da paıdaly bolmaq, — dedi Alekseı Bogdanov.
ExpoGroup kompanııasynyń dırektory Sholpan Qojabaeva KazAgro/KazFarm-2025 kórmesi bıyl 16-shy ret ótetindigin aıtty.
— KazAgro/KazFarm kórmeleri Ortalyq Azııadaǵy, jalpy TMD elderindegi eń úlken, aýqymdy agrarlyq kórme sanalady. Búginde kórmege álemniń 25 elinen 300-ge jýyq kompanııa tirkeldi. Olardyń biri — Belarýs. Osyndaı kórmelerdiń arqasynda otandyq ónimderimizdi eksportqa shyǵarýǵa kómektesemiz. Sheteldik ınvestorlar men sharýa qojalyqtary arasyndaǵy baılanysqa dáneker bolamyz, — dedi ol.
Budan buryn Belarýs elindegi halyqaralyq kórmede Qazaqstannyń IT startaptary tanystyrylǵanyn jazǵan edik.