Elordada alǵash ret elektrosamokattarǵa arnalǵan arnaıy turaqtar ashylady

ASTANA. KAZINFORM – Astanada alǵash ret elektrosamokattarǵa arnalǵan arnaıy turaq aımaqtary ashylady. Joba pılottyq rejımde Nura aýdanynda iske asyrylmaq. Ol úshin samokattar jıi tastalyp ketetin on oryn tańdalynady, dep habarlaıdy elorda ákimdiginiń resmı saıty.

Turaqtar arnaıy jol belgilerimen jáne syzyqtyq belgileýmen belgilenedi. Kıksherıng paıdalanýshylary saparlaryn dál osy jerlerde aıaqtaýy tıis. Bul trotýar men jol jıeginde beı-bereket tastalǵan samokattarǵa qatysty shaǵymdardy azaıtýǵa kómektesedi.

– Astanalyqtardan kelip túsetin eń jıi shaǵymdardyń biri – beı-bereket tastalǵan samokattar. Arnaıy turaq aımaqtary osy máselege tártip ornatyp, qalada qozǵalysty qaýipsiz etedi, - dep atap ótti Nura aýdanynyń ákimdigi.

Bul jumysqa iKomek jedel áreket etý jáne monıtorıng ortalyǵy da qosyldy. Ortalyqta samokattardyń durys qoıylmaýyna baılanysty shaǵymdardy jedel óńdeý úshin jańa jikteý júıesi ázirlenip, operatorlarǵa arnaıy oqytý júrgizilmek. 

Bastamany Q88 aýmaqtardy turaqty damytý qaýymdastyǵy men elordadaǵy barlyq kıksherıng kompanııasy qoldady.

Elektrosamokat júrgizý mádenıeti men qaýipsizdigin arttyrý maqsatynda jol kartasy da ázirlendi. Qalalyq basqarmalar, polıtsııa jáne kıksherıng kompanııalarymen birlese otyryp, aqparattyq kampanııalar, qaýipsiz júrgizý boıynsha sabaqtar jáne ereje buzýshylyqtardy anyqtaý reıdteri uıymdastyrylady.

Buǵan deıin Qazaqstanda elektrosamokattarǵa nómir taǵý mindettelýi múmkin ekenin jazǵan bolatynbyz.