Elordada aldaǵy oqý jylynda qansha mektep salynady
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda qalada salynatyn mektepter týraly jazdy, dep habarlaıdy elorda ákimdiginiń resmı saıty.
– Bizdiń basym mindetterimizdiń biri – áleýmettik ınfraqurylymdy damytý. Olar – oqý oryndarynyń, medıtsınalyq mekemelerdiń, balabaqshalardyń, stýdentterge arnalǵan jataqhanalardyń, Oqýshylar saraılarynyń, qoǵamdyq keńistikterdiń (saıabaqtar, gúlzarlar, jelekjoldar), aýlalardyń jáne t.b. qurylysy.
Máselen, mektep týraly aıtar bolsaq, 2024 jyly bilim oshaǵyn 12,5 myńnan astam oqýshy támamdady. Al sol ýaqytta birinshi synypqa 28,5 myńnan astam bala bardy. Birinshi synyp oqýshylarynyń sany túlekter sanynan 2 eseden asyp túsedi. Tıisinshe qalada jyl saıyn mektepter salý qajet, - dedi Astana qalasynyń ákimi.
Jeńis Qasymbek qalany aralaý barysynda M.Tólebaev pen Býrabaı, Sh.Qudaıberdiuly dańǵyly men І.Jansúgirov kósheleriniń qıylystarynda, sol sııaqty Egemen Qazaqstan, Imanov kóshelerinde ornalasqan birqatar mekteptiń qurylys barysymen tanysqanyn aıtty.
Sondaı-aq osy oqý jylynyń basynan beri 24 oqý ornyn salynyp, qoldanysqa berilgeni, bul – elorda úshin rekordtyq kórsetkish ekenin atap ótti.
– Atalǵan mektepter eki aýysymda 66 myńǵa jýyq oqýshy ornyn ashýǵa múmkindik berdi. 24 oqý ornynyń – 16-sy jaıly mektep. «Jaıly mektep» ulttyq jobasy aıasynda Memleket basshysynyń tapsyrmasy boıynsha jańa formatta 24 mektep salynady. Bul jaıly bilim ordalary eki aýysymda 90 myńǵa jýyq oqýshy ornyn ashýǵa múmkindik beredi.
Jańa oqý jylynda taǵy 15 mektep ashýdy josparlap otyrmyz. Oqý oryndarynyń qurylysyna da jeke qarajat tartamyz. Sonymen qatar jyl saıyn pedagog mamandyǵyna granttar bóle otyryp, kadrlar daıarlaýmen aınalysamyz. Qazirgi ýaqytta qala ákimdiginiń granty boıynsha JOO-da 2 myń 200-ge jýyq adam bilim alyp júr, - dep jazdy J. Qasymbek.