Elordada 1 574 otbasy bıyl baspanaly bolady

ASTANA. QazAqparat - Elimizde «Qoljetimdi turǵyn úı - 2020» memlekettik baǵdarlamasyn iske asyrý jalǵasyp jatyr. Astana qalasy Qurylys basqarmasynyń málimetinshe, qazirgi kezde baǵdarlama aıasynda jalpy aýdany 130 myń sharshy metrdi quraıtyn 2 671 páterlik segiz turǵyn úı salynyp jatyr, dep habarlady astana.kz.

Aldaǵy eki aıda bes turǵyn úı keshenin paıdalanýǵa berý josparlanǵan. Osylaısha, 1 574 otbasy jyl sońyna deıin qonys toıyn toılaıdy. Myna baǵyttar boıynsha baǵdarlamaǵa qatysqan azamattar baspanaly bolady:

- «Qazaqstannyń turǵyn úı-qurylys jınaq banki» AQ jelisi boıynsha jalpy aýdany 25, 2 myń sharshy m quraıtyn 472 páterlik Saýran jáne №24 kósheleriniń qıylysynda jáne Aınakól kóshesinde ornalasqan turǵyn úı keshenderi;

- «Jas otbasylar» baǵyty boıynsha jalpy aýdany 38,3 myń sharshy metrdi quraıtyn 672 páter. Turǵyn úı keshenderi Tilendıev dańǵylynyń ońtústiginde Sarybulaq ózeniniń boıynda jáne Saraıshyq kóshesiniń ońtústiginde ornalasqan;

- «Kezekte turǵandarǵa arnalǵan turǵyn úı» baǵyty boıynsha jalpy aýdany 17,1 myń sharshy metrdi quraıtyn 430 páter. Baǵdarlamaǵa qatysýshylardyń osy sanatyna arnalǵan turǵyn úı keshenderi Saraıshyq kóshesiniń jáne Tilendıev dańǵylynyń ońtústiginde, Sarybulaq ózeniniń boıynan oryn tepken.

1097 páterge arnalǵan qalǵan úsh turǵyn úı keshenin 2015 jyly paıdalanýǵa berý josparlanǵan. Olar Brýsılovskıı, Imanov, Jubanov kósheleriniń aýmaǵynda jáne Tilendıev dańǵylynyń ońtústiginde ornalasady.

Jalpy baǵdarlamany iske asyrý aıasynda 2013-2020 jyldary 63 mln sharshy metrge jýyq jańa baspana tapsyrylmaq, sonyń esebinen 1 mıllıonǵa jýyq qazaqstandyq otbasynyń turǵyn úı jaǵdaıy jaqsarady.