Elorda áýejaıynyń IATA úsh áriptik kody ózgertilmek

NUR-SULTAN. QazAqparat - QR IIDM Azamattyq avıatsııa komıteti Nur-Sultan qalasy áýejaıynyń úsh áriptik IATA kodyn ózgertý máselesinde belsendi jumysyn jalǵastyrýda, dep habarlaıdy vedomstvonyń baspasóz qyzmeti.

Búgin Nur-Sultan qalasyna turaqty reısterdi júzege asyratyn IATA halyqaralyq áýe kóligi qaýymdastyǵy músheleri Air Astana, SCAT, Belavia, LOT Polish Airlines, Turkish Airlines, Air China, Uzbekistan Airways jáne FlyDubai qazaqstandyq jáne sheteldik áýe kompanııalarynyń ókilderiniń qatysýymen arnaıy keńes ótti.

Jıynnyń qorytyndysy boıynsha Nur-Sultan qalasy áýejaıynyń úsh áriptik kodyn aýystyrý týraly sheshimdi áýe kompanııalar biraýyzdan qoldady. Bul sheshimniń hattamasy IATA shtab-páterine jiberiledi.

Azamattyq avıatsııa komıteti Nur-Sultan qalasy áýejaıynyń úsh áriptik kodyn ózgertý boıynsha IATA-men jumysty jalǵastyrady.