Elimizdiń memlekettik qaryzy ósip barady - senator
ASTANA. KAZINFORM – Senator Sultanbek Mákejanov elimizdiń Premer-Mınıstri Oljas Bektenovke memlekettik qaryzdyń ósip bara jatqany jáne elimizdiń qarjy resýrsyn basqarýdy jaqsartý qajettigi týraly saýal joldady.
Depýtat óziniń saýalynda bıýdjet tapshylyǵy men memlekettik qaryzdyń ósýine ákep soǵatyn, kirispen rastalmaǵan memlekettik shyǵystyń ulǵaıýy – memlekettik qarjynyń ózekti máselesiniń biri ekenin atap ótti.
S.Mákejanovtyń málimetinshe, 2024 jylǵy 1 shildedegi jaǵdaı boıynsha memlekettik borysh jalpy ishki ónimge shaqqanda 21,3 paıyzdy quraǵan. Bul turǵyda bekitilgen lımıt boıynsha memlekettiń qaryzy JІÓ-ge shaqqanda 32 paıyzdan aspaýy kerek. Jalpy, bıylǵy birinshi jartyjyldyqta memlekettik borysh 1,6 trln teńgege ósip, 28,7 trln teńgege jetti.
Senator qaryzdyń JІÓ-ge shaqqandaǵy úlesi ázirge qolaıly deńgeıde turǵanyn aıta kele, alaıda memlekettik qaryzǵa qyzmet kórsetý shyǵynynyń ósýine budan ári jol bermeý kerek ekenin jetkizdi.
«Memlekettik qaryzǵa qyzmet kórsetýge arnalǵan shyǵystar 2014 jyldan bastap jalpy ishki ónimge shaqqanda 0,6 paıyzdan 2,7 paıyzǵa deıin ósti... Odan basqa, 2025 jylǵa qaryzdy óteýge jáne olarǵa qyzmet kórsetýge 6,1 trln teńge bólý kózdelgen. Bul óz kezeginde Ulttyq qordan beriletin transfertterdi esepke almaǵanda, respýblıkalyq bıýdjet kirisiniń 38%-yn quraıdy», - dedi ol Senattyń jalpy otyrysynda.
Depýtat osyǵan baılanysty Úkimetke qaryzdy óteýge jumsalatyn memlekettik shyǵystardyń qarqynyna monıtorıng pen baqylaýdy kúsheıtýdi jáne jıyntyq memlekettik borysh pen kvazımemlekettik sektordyń boryshyn basqarýdyń naqty tujyrymdamasyn aıqyndaýdy usyndy.
«Qazirgi qaryzdardyń tıimdiligine monıtorıng jasaý men jańa qaryzdardyń oryndylyǵyn taldaýǵa, sondaı-aq olardyń ıgerilýine baqylaýdy kúsheıtý qajet. Qaryz alýǵa shekteýdiń jetkilikti ekendigi týraly máseleni qarastyrý qajet», - dedi Sultanbek Mákejanov.
Budan buryn habarlanǵandaı, jaqynda Májilistiń jalpy otyrysynda Premer-mınıstrdiń orynbasary – Ulttyq ekonomıka mınıstri Nurlan Baıbazarov memlekettik qaryzǵa qatysty túsinik berdi.
Onyń aıtýynsha, memlekettiń boryshy jalpy ishki ónimge shaqqanda 23 paıyzdan asqan.
