Elimizden Google for Education jobasyna qansha mektep qatysady
ASTANA. KAZINFORM – Qazaqstanda Google for Education ekojúıesin engizý boıynsha pılottyq joba bastaldy.
Bul bastama Bilim berý salasyn turaqty damytý qory men Google kompanııasy arasyndaǵy kelisimniń arqasynda múmkin bolyp otyr. QR Oqý-aǵartý mınıstrligi jobaǵa qoldaý kórsetedi.
Jobanyń alǵashqy kezeńinde elimizdiń 16 aımaǵynan 20 aýyldy jerdegi mektep ekojúıege qosylady. Al olardyń 5-eýi aldaǵy úsh jylda Google Reference School mártebesin alady.
Sondaı-aq jobaǵa qatysatyn ár synyp Google for Education platformasyna qol jetkize alady. Platforma birneshe múmkindikke jol ashady:
· Google Classroom, tapsyrmalar, oqý protsesin uıymdastyrýǵa arnalǵan tehnologııalar;
· BigQuery jáne Looker Studio analıtıkalyq júıeleri;
· Gemini AI – tapsyrmalardy jasaý jáne mátindi tekserýge baǵyttalǵan jasandy ıntellekt;
· Oqý nátıjesin arttyrý úshin qujattarǵa, kestelerge, saıttarǵa, beınelerge, AppSheet-ke jáne basqa quraldar.
Joba aıasynda 200-den astam muǵalim oqytýdan ótip, Google Educator halyqaralyq mártebesine ıe bolady.
– Google for Education ustazdardy almastyrmaıdy. Ol oqý protsesin avtomattandyrýǵa kómektesedi, oqý kontentin qurý protsesin jeńildetedi, tapsyrmalardy daıyndaý men tekserýge ýaqytty únemdeıdi, oqytýdy jekelendiredi jáne bilim berý protsesiniń barlyq qatysýshynyń tsıfrlyq quzyretterin keńeıtedi, - dep atap ótti Bilim berý salasyn turaqty damytý qory ókilderi.
Órel aýylyndaǵy orta mektep – Google platformasyna tolyqqandy qosylatyn alǵashqy mektep. AITAS holdınginiń demeýshiligimen mektep arnaıy derbes Chromebook formatyndaǵy noýtbýkterimen jabdyqtalyp, Google Workspace-ke qol jetkizedi. Jergilikti atqarýshy organdar Internetke turaqty qosylýdy qamtamasyz etedi.
Aıta keteıik, búginde álemde 50 mıllıonnan astam oqýshy men oqytýshy Chromebook-ti bilim berý mazmunyn qurý, birlesip jumys isteý jáne baılanys ornatý úshin paıdalanady. 2021 jyly Chromebook bastaýysh jáne orta mekteptegi úzdik oqý quraly retinde tanyldy.
Atalmysh baǵdarlama Bilim berý salasyn turaqty damytý qorynyń strategııalyq maqsattarynyń biri – aýyl men qala oqýshylary arasyndaǵy bilim deńgeıindegi aıyrmashylyqty azaıtý baǵytyndaǵy mańyzdy joba bolady.
Buǵan deıin Qazaqstandaǵy úzdik ustazdar mektepterge tálimgerlik etetinin jazǵan edik.