Elimizdegi ǵylymı qyzmetkerlerdiń 56%-y áıelder — UǴA prezıdenti
ALMATY. KAZINFORM — Almaty qalasynyń Ǵylym ordasynda mereke qarsańynda QR Prezıdentiniń janyndaǵy Ulttyq ǵylym akademııasy elimizdiń áıel ǵalymdaryna alǵash ret N.Bazanova atyndaǵy marapatty tabystady.
Otandyq ǵylymdy damytýǵa aıryqsha úles qosqan ǵylymı qyzmetkerler, oqytýshylar men JOO, ǵylymı uıymdardyń basshylary qatysqan is-sharada sóz alǵan Ulttyq ǵylym akademııasynyń prezıdenti Aqylbek Kúrishbaev ǵylymdaǵy áıelderdiń ornyn erekshe atap ótti.
— Búgingi tańda áıelderdiń qoǵamdaǵy alar orny aıryqsha. Olar ǵylym men bilimniń damýyna súbeli úles qosyp qana qoımaı, qoǵamnyń zııatkerlik áleýetin arttyrýǵa, jas urpaqty tárbıeleýge jáne el bolashaǵyn qalyptastyrýǵa zor eńbek sińirip keledi. Statıstıkalyq derekter boıynsha jyl saıyn ǵylymı jumystarmen shuǵyldanatyn áıelderdiń úlesi artyp jatyr. Máselen, elimizde ǵylymı zertteýlermen 12 893 áıel aınalysady, bul — ǵylymı qyzmetkerlerdiń shamamen 56%-y. Olardyń ishinde ǵylym doktorlary — 898, ǵylym kandıdattary — 2 859, PhD — 2 229 jáne beıini boıynsha doktorlar — 185, — dedi QR UǴA prezıdenti.
Sondaı-aq saltanatty is-shara barysynda Almaty qalasy ákiminiń quttyqtaýy oqyldy. Onda 2024 jyldan bastap qala tarapynan ǵylymdy damytýǵa granttyq qarjylandyrý qarastyrylǵany aıtyldy. Bıyl osy maqsatta jergilikti bıýdjetten 348 mıllıon teńge bólingen. Ol ǵylymı-granttyq jobalardy iske asyrýǵa jumsalmaq.
Eske salaıyq, buǵan deıin Aqylbek Kúrishbaev ǵylymǵa bólinetin aqshanyń 70 paıyzy Almaty men Astanada qalyp jatqanyn aıtqan edi.