Elimizdegi dári-dármektiń 53,2% tsıfrlyq tańbalanǵan
ASTANA. KAZINFORM – Búginde dári-dármekti tańbalaý júıesine 8 myńnan astam dárihana, 1900-den astam medıtsınalyq mekeme qatysyp jatyr.
Densaýlyq saqtaý mınıstrliginiń málimetinshe, elimizde dári-dármekti tsıfrlyq tańbalaý jáne qadaǵalaý júıesin birizdendirý aıaqtaldy. Búginde júıede 19 otandyq taýar óndirýshi, 276 kóterme satý sýbektisi, 8 myńnan astam dárihana jáne 1900-den astam medıtsınalyq uıym jumys isteıdi.
— Іri dıstrıbıýtorlar tańbalanǵan preparattardyń 60,9 mln qaptamasyn ákelýdi júzege asyrdy, onyń 46 mıllıony aınalymǵa engizildi. Dárihanalar 48,4 mıllıon qaptama qabyldady jáne 29,2 mıllıon qaptama dári-dármek aınalymnan shyǵaryldy. Tsıfrlyq tańbalaý engizilgen sátten bastap (2024 jylǵy 1 shilde) otandyq óndiristegi 110,4 mln dári-dármek tańbalanyp, 76,8 mln aınalymǵa shyqty, — delingen habarlamada.
Osy oraıda vedomstvo preparattardy tańbalaý men qadaǵalaýdyń aqparattyq júıesinde dári-dármekti ýaqtyly qabyldaý men aınalymnan shyǵarýdyń turaqty monıtorıngi júzege asyrylatynyn habarlap otyr.
Máselen, osy naýryz aıyndaǵy jaǵdaı boıynsha medıtsınalyq uıymdarda dári-dármektiń 53,2%-dy tańbalanǵan, bul qańtardyń sońyndaǵy kórsetkishtermen salystyrǵanda 17,1%-ǵa joǵary.
Sonymen qatar Densaýlyq saqtaý mınıstrligi tańbalaý operatorymen aınalymǵa qatysýshylardy oqytý jáne konsýltatsııa berý boıynsha júıeli jumysty, sondaı-aq dári-dármek aınalymynyń barlyq kezeńinde baqylaý tıimdiligi men ashyqtyǵyn arttyrý úshin aqparattyq júıelerdiń taldamalyq modýlderin jetildirý protsesin jalǵastyryp jatyr.
Eske sala ketsek, elimizde barlyq dári-dármekti mindetti tsıfrlyq tańbalaý 2024 jyldyń 1 shildede engizildi. Atalǵan shara kontrafaktilik ónimdermen kúresýge jáne dári-dármek naryǵynyń ashyqtyǵyn arttyrýǵa baǵyttalǵan. Ótken jyly qarashada tańbalaý jáne qadaǵalaý júıesin odan ári damytý jónindegi jol kartasy bekitildi, onda jobanyń tehnıkalyq jáne uıymdastyrýshylyq damýynyń negizgi baǵyttary aıqyndaldy.
Búgin elimizde ári-dármekti retseptisiz satý máselesi rettelmeı turǵany týraly jazǵan bolatynbyz.