Rezervtegi áskerıler urysqa daıyn quram retinde jasaqtalady – E.Bapı
15 qarasha kúni Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine rezervtegi qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaralady, dep habarlaıdy Kazinform.
Qujatty elimizdiń Qorǵanys mınıstrligi ázirledi. Byltyr jeltoqsanda Májilis qaraýyna engizilgen osy zań jobasyn depýtattar jumys tobynyń otyrystarynda egjeı-tegjeıli talqydan ótkizdi. Osy oraıda depýtat Ermurat Bapı bul qujattyń negizgi maqsatyna qatysty túsinik berdi.
«Jaman aıtpaı, jaqsy joq, eger de elimizge áldebir qater tóngen jaǵdaıda, burynǵydaı mobılızatsııaǵa shaqyryp, odan keıin áskerge shaqyrylǵan azamattyń kıim-keshegin berip, olardy daıyndyqtan ótkizý, qarý-jaraqpen qamtamasyz etý qadamdary tym uzaq protsess. Al rezervtegi áskerler - bul áskerdiń jańa túri. Olar belgilegen merzimde jaýyngerlik daıyndyqtan ótip turady. Turaqty túrde tıisti oqý-jattyǵý jıyndary uıymdastyrylady. Osynyń nátıjesinde daıyndyqtan ótkenderdi ýákiletti organ tıisti áskerı bólimshelerge birden baǵyttaıdy», - dedi E.Bapı.
Atap aıtqanda, rezervtegi qyzmetke tartylǵandar urysqa daıyn quram retinde jasaqtalady. Bul rezervtegi qyzmet qysqa merzimde tıisti áskerı bólimge kelýge, sondaı-aq qoıylǵan mindetterdi oryndaýǵa dereý kirisýge daıarlanǵan azamattardyń saqadaı-saı turýyna septigin tıgizedi.
«Osy zań jobasyn ázirleýdiń negizgi maqsatyna toqtalsaq, qazirgi álemdegi geosaıası jaǵdaı kezinde elimizdiń qorǵanys qabiletin nyǵaıtýǵa baǵyttalǵan. Bul turǵyda rezervtegi azamattar arqyly ásker qataryn jyldam toltyrý qarastyrylǵan. Olar aldyn ala daıyndyqtan ótedi. Rezervtegilerdi jumyldyrý qajet bolsa, daıyndyqtan ótkender birinshi dabyldan keıin óziniń áskerı bólimine kelip, ózi jaýapty áskerı beketke barady nemese áskerı tehnıkasyna otyrady», - dedi depýtat.
Rezervtegi qyzmetke tartylǵandarmen erikti túrde kelisimshart jasalady. Sonymen qatar, zań jobasynda rezervte turǵan adam men jumys berýshi arasynda qatynastardy retteý tetikteri bar.
«Rezervke barýǵa ár adam erikti túrde tańdaý jasaıdy. Ásirese, jumyssyz júrgenderdi áskerge tartý pysyqtaldy. Bul rette tıisti jalaqy tólenedi. Máselen, aı saıyn birneshe sabaqqa qatysqandarǵa mınımaldy jalaqy, al oqý-jattyǵý jıyndary kezinde ortasha aılyq jalaqy beriledi», - dedi Ermurat Seıtqazyuly.
Tótenshe nemese soǵys jaǵdaıynda jalaqy máselesi tıisti zańdar aıasynda retteletin bolady.
Depýtattyń sózine qaraǵanda, bul zań jobasyn ázirleý kezinde álemdegi birqatar qaqtyǵys aımaǵynda jınaqtalǵan tájirıbe zertteldi. Zań jobasyn Qorǵanys mınıstrligi daıarlap, bul vedomstvo biraz derekti zerdelegen.
«Atap aıtqanda, osy aptada Májiliste qaralatyn «Qazaqstan Respýblıkasynyń keıbir zańnamalyq aktilerine rezervtegi qyzmet máseleleri boıynsha ózgerister men tolyqtyrýlar engizý týraly» zańy jyl sońyna deıin qabyldanýy kerek. Sebebi bul qujattyń tájirıbe júzinde iske asyrylýy keler jyldan bastap qolǵa alynady. Rezervtegi alǵashqy áskerı quramalar 2025 jyldan quryla bastaıdy. Jalpy, qazirgi teńselip turǵan geosaıası jaǵdaıdy eskere otyryp, arqany keńge salyp júrýge bolmaıdy. Bul zań qabyldanǵannan keıin, Qorǵanys mınıstrligi shuǵyl jumystarǵa kirisedi», - dedi Ermurat Bapı.
Munymen qosa, osy qujat aıasynda rezervtegi qyzmetke jumyldyrylǵandardyń jaýapkershiligi men mindeti, tártibi jan-jaqty belgilenedi.
Zań qabyldanǵan jaǵdaıda, qorǵanys salasyna bólinetin bıýdjet qarajaty birshama ósýi múmkin.
