Elimizde óńdeý ónerkásibi 6% deńgeıinde ósýi yqtımal — Úkimet
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Ekonomıkalyq ósimdi qamtamasyz etý jónindegi shtabtyń kezekti otyrysynda 2026 jylǵy qańtar-naýryzdaǵy áleýmettik-ekonomıkalyq damýdyń boljamdy kórsetkishi qaraldy.
Úkimettiń baspasóz qyzmeti málim etkendeı, aldyn ala derek boıynsha, 2026 jylǵy qańtar-naýryz aılarynyń qorytyndysynda óńdeý ónerkásibinde 6% deńgeıinde ósim oryn alýy múmkin.
Ulttyq statıstıka bıýrosynyń aqparaty boıynsha birqatar salada turaqty oń dınamıka saqtalǵan, máselen:
- jeńil ónerkásip — 156,4%,
- daıyn metall buıymy — 131,4%,
- jıhaz óndirisi — 127,6%,
- qurylys materıaly óndirisi — 127,4%
- jáne mashına jasaý — 115,5%.
Kólik mınıstrliginiń habarlaýynsha, eseptik kezeńde kólik salasynyń ósýi 109% deńgeıinde dep baǵalanǵan. Kórsetilgen qyzmettiń jalpy kólemi 2,8 trln teńgeni quraǵan, bul ótken jylǵy sáıkes kezeńnen 14,3%-ǵa joǵary.
Oń dınamıka tasymaldaý kóleminiń ulǵaıýy esebinen qamtamasyz etilgen. Osylaısha, jalpy júk tasymaldaý kólemi 7,9%-ǵa, ıaǵnı 290,9 mln tonnaǵa ósken. Jolaýshylardy barlyq kólik túrimen tasymaldaý 11,0%-ǵa, ıaǵnı 491,2 mln jolaýshyǵa deıin artty.
Júk aınalymy 153,7 mlrd tonna-shaqyrym bolyp, 11,8%-ǵa artsa, jolaýshylar aınalymy 10,1%-ǵa ósip, 22,8 mlrd jolaýshy-shaqyrymǵa jetti.
Jedel derekter boıynsha, 2026 jylǵy úsh aıda júkti temirjol kóligimen tasymaldaý kólemi 78,3 mln tonna bolǵan. Bul 2025 jylǵy sáıkes kezeńnen 3,6%-ǵa artyq (+2,7 mln tonna). Tasymaldardy sanattarǵa bólip qarastyrsaq, el ishindegi tasymal 40,8 mln tonnany, eksport 22,8 mln tonnany, ımport 5,6 mln tonnany, tranzıt 9,1 mln tonnany qurady.
Eksport qurylymynda kómir, astyq, tyńaıtqysh, qurylysqa qatysty júkter, qara metall, sondaı-aq basqa da júk (onyń ishinde qurama jem, ósimdik maıy, asbest) tasymalynyń óskeni baıqalady.
Respýblıka ishindegi qatynasta kómir, munaı ónimi, astyq, hımıkat tasymaly artqan.
Otyrysty qorytyndylaı kele, Serik Jumanǵarın salalyq memlekettik organdarǵa ekonomıkalyq ósimniń qosymsha rezervin anyqtaýdy, onyń ishinde memlekettik qoldaý quralyn paıdalaný jónindegi jumysty jandandyrýdy tapsyrdy.
— Bizge qosymsha ónim shyǵarý nemese jańa turǵyn úıdi paıdalanýǵa berý arqyly bolsa da óndiris pen qyzmet kólemin naqty ulǵaıtý qajet. Kerek bolǵan jaǵdaıda memleket mundaı bastamalardy, onyń ishinde, sýbsıdııalaý tetigi arqyly da qoldaýǵa daıyn, — dep atap ótti vıtse-premer.
Budan buryn Jumanǵarın elimizdiń ákimshilik-aýmaqtyq qurylysyn jetildiretin zań jobasy ázirlengenin aıtty.