Elimizde memlekettik maınıng óndirisi bastalady

ASTANA. KAZINFORM — Qazaqstanda krıptovalıýta aınalymyna ruqsat beriledi. Odan bólek maınerlik qyzmetti de zańdastyrý josparlanǵan. Memleket basshysynyń krıptoındýstrııany damytý jónindegi tapsyrmasynan soń Úkimet osyndaı bastamalardy qolǵa aldy, dep habarlaıdy Jibek Joly telearnasy.

Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevtiń aıtýynsha, memlekettik maınıng óndirisine ınvestıtsııa tartý kezek kúttirmeıtin sharýanyń biri bolyp tur.

— Negizgi baǵyttardyń biri zańnamalyq bastamalardy iske asyrý bolyp tabylady, onda krıptoındýstrııany lıberalızatsııalaý jáne tsıfrlyq maınıng ındýstrııasyna ınvestıtsııalar tartý boıynsha túzetýler ázirlendi, — dedi Jaslan Mádıev.

Mınıstrdiń sózinshe, naqty aktıvterdi tokendeý boıynsha da arnaıy jospar bar. Bul jer, jyljymaıtyn múlik, altyn, munaı, óner týyndysy, aktsııa, oblıgatsııa sııaqty qundy dúnıeniń blokcheınde tsıfrlyq token túrin jasaý degen sóz. Máselen, sizde 1 keli altyn bar delik. Sol altyndy elektrondy saqtaý qoımasyn bekitip, oǵan sáıkes 1 token shyǵarasyz. Bul token krıptobırja aınalymyna enedi. Jáne ony basqa adamdarǵa sata alasyz.

— AHQO-da maınerler óndirgen tsıfrlyq aktıvterdi satý týraly mindettemeni alyp tastaý kerek. Sondaı-aq elektr stantsııalaryn jańǵyrtý boıynsha «70/30 baǵdarlamasy» jobasyn iske asyrýdy qamtıdy, — dedi Tsıfrlyq damý mınıstri.

Tsıfrlyq saladaǵy ózgeris kólik ınfraqurylymyna kelip jetti. Máselen, jyl sońyna deıin pılotsyz kólik quraldaryna qatysty arnaıy zań shyǵady. Bul degenimiz avtopılot basqaratyn mashınalar qozǵalysyna ruqsat beriledi degen sóz. Biraq, soǵan laıyq jol ýchaskelerinde ǵana. Qazirgi trassanyń basym bóligi mundaı ózgeriske daıyn emes ekeni anyq. Sondyqtan «smart» joldardy salý isi josparlanyp jatyr.

— Túzetýler aldyn ala barlyq memlekettik organmen kelisildi. Jyl sońyna deıin qabyldaıtyn bolamyz. Bul rette, pılotsyz kólikterdi qoldaný tıisti ınfraqurylymnyń bolýyn talap etedi. Osyǵan baılanysty pılotsyz kólikter arqyly júk tasymalyn uıymdastyrý úshin «smart» joldardy salý múmkindigi qarastyrylyp jatyr. Qazir pılotsyz júk tasymalyn Qazaqstan — Qytaı shekarasynda (Baqty — Pokıtý) qoldaný boıynsha jumys qolǵa alyndy, — dedi Kólik vıtse-mınıstri Maqsat Qalıaqparov.

Mınıstrlerdiń usynysy Úkimet basshysynyń kóńilinen shyqqan syńaıly. Oljas Bektenov atalǵan bastamalardy jyldam júzege asyrýdy tapsyrdy. Bul tusta tsıfrlyq damý mınıstrine artylar júk aýyr. Sondyqtan jańa vedomstvo qurý isin erterek qolǵa alý kerek dedi premer-mınıstr.

— Tsıfrlyq damý mınıstrligi Parlament qabyrǵasynda Tsıfrlyq kodekstiń jáne «Jasandy ıntellekt týraly» zań jobalarynyń pysyqtalýyn jedeldetsin. Budan bólek, tsıfrlandyrýdy jáne jasandy ıntellektini damytý jónindegi «Digital Qazaqstan» tujyrymdamalyq qujatyn ázirleýge kirisý kerek. Atalǵan qujat salanyń aldaǵy úsh jylǵa arnalǵan negizgi baǵyttaryn qamtyp, jaýapkershiliktiń ara-jigin naqty bólip berýi qajet. Buǵan qosa, qujatta tıisti nátıjeler de kórinis tabýy kerek, — dedi premer-mınıstr Oljas Bektenov.

Jańa ınnovatsııalardy qarqyndy qoldanysqa engizý úshin halyqtyń saýatyn ashý nazardan tys qalmaý qajet. Sondyqtan aldaǵy 5 jylda 1 mıllıon adamǵa jasandy ıntellekt daǵdylaryn úıretemiz deıdi jaýaptylar.