Qazaqstanda lızıng naryǵynyń kólemi 2,7 trln teńgege jetti
ASTANA. KAZINFORM — Búginde otandyq lızıng naryǵynda shamamen 300 sýbekt qyzmet atqaryp jatyr. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti.
— Lızıngtik kompanııalardyń derekterine sáıkes, 2025 jylǵy 1 qańtardaǵy jaǵdaı boıynsha lızıngtik portfeldiń kólemi 2,7 trln teńgeni quraıdy, bul ótken jylmen salystyrǵanda 45,6%-ǵa artqan. Lızıngtik operatsııanyń negizgi bóligi, ıaǵnı 93%-y ónerkásipti damytý qoryna jáne QazAgroQarjyǵa tıesili. Jekemenshik kompanııalardyń portfeli búginde 200 mlrd teńgeni, ıaǵnı jalpy lızıng kóleminiń 7%-yn quraıdy. Onyń ishinde 96 mlrd teńgeni bankterdiń tórt enshiles lızıngtik kompanııasy bergen. Olardyń qatarynda Halyk Leasing, BCC Leasing, Nur Leasing jáne Forte Leasing, — dedi Mádına Ábilqasymova elordada lızıng taqyrybyna arnalǵan konferentsııada.
Agenttik tóraǵasy keltirgen málimetke sáıkes, lızıng alý boıynsha 28,5% kólik sektoryna, 26,3% ónerkásipke jáne 25,7 aýyl sharýashylyǵyna tıesili.
— Jalpy, 2,7 trln teńge kóleminde lızıngtik operatsııa jasaldy, bul aıtarlyqtaı mańyzǵa ıe. Atalǵan kórsetkishti ekinshi deńgeıli bankterdiń kredıttik portfelimen salystyrsaq, ótken jyly bıznesti kredıtteý kólemi 13,1 trln teńgeni quraǵan. Ótken jyly bankter tarapynan bızneske berilgen kredıtter kólemi 16,3%-ǵa artqanyn baıqadyq. Sondaı-aq, jeke kásipkerlerdi nesıeleýde de joǵary ósim tirkeldi — 47%-ǵa ósip, 2,3 trln teńgege jetti. Shaǵyn jáne orta bıznes sýbektileriniń kredıtteri 13,1%-ǵa ósip, 6,5 trln teńgeni qurady. Jalpy alǵanda, banktik nesıelerdi paıdalanatyn qaryz alýshylar sanynyń da edáýir artqanyn kórýge bolady, ósim 20%-dy qurap, 533 myń bıznes sýbektige jetti, — deıdi ol.
Buǵan deıin qazaqstandyq kásipkerlerge lızıng alýdyń tıimdiligi týraly jazǵan edik.
Aıta keteıik, Qazaqstanda lızıng assotsıatsııasy quryldy.
Búgin elordada «Qazlızıng — 2025: ónerkásip pen kásipkerlikti qarjylandyrý kózi retinde Qazaqstanda lızıngti damytý perspektıvalary» atty alǵash konferentsııasy ótip jatyr.