Elimizde qasıetti Oraza aıt meıramy bastaldy

ASTANA. KAZINFORM — Búgin 20 naýryz Qazaqstan musylmandary oraza aıtty toılap jatyr. 

Oraza aıt — Islam dinindegi eń mańyzdy meıramdardyń biri. Ol bir aıǵa sozylǵan orazadan keıin toılanady.

Qazaqstan Musylmandary dinı basqarmasy «aıt» sózin merekeleý, kóńil bólý, qýanysh syılaý jáne ortaq shattyqta bas qosý degen maǵynalardy beretinin túsindiredi. Tutas bir aı boıy nıet etip, oraza ustaǵan jan úshin bul kún — jasaǵan ıgi isteriniń qaıtarymy.

Musylman qaýymy bir-birin quttyqtaýdy orazanyń sońǵy kúni, kún batqan sátten-aq bastaıdy.

Aıttyń alǵashqy kúni tańerteń jamaǵat meshitterge jınalyp, aıt namazyn oqıdy. Odan keıin keń dastarhan jaıylyp, aǵaıyn-týys pen dos-jaranǵa zııarat jasaý, syılyq berý jáne jaqyndarmen ýaqyt ótkizý dástúrge aınalǵan.

Bul meıram — rýhanı kemeldenýdiń, qaıyrymdylyq pen musylman úmbetiniń birliginiń nyshany. Bul kúni adamdar bir-birine tynyshtyq, bereke men toqshylyq tileıdi.

Bıyl qasıetti Ramazan aıy 19 aqpanda bastalyp, 19 naýryzda aıaqtaldy.
Al 16-nan 17 naýryzǵa qaraǵan túni qasıetti Qadir túni ótti.

QMDB kestesine sáıkes, bıyl Qurban aıt 27-29 mamyr aralyǵyna sáıkes keledi.

Memleket basshysy Qasym-Jomart Toqaev barsha qazaqstandyqtardy Oraza aıt merekesimen quttyqtap, aq tilegin bildirgen bolatyn.