Elimizde hımııa ónimderiniń eksporty artyp keledi
ASTANA. KAZINFORM – Elimizdiń hımııa ónerkásibinde 1093 kásiporyn jumys isteıdi, onyń ishinde irisi – 12, ortashasy – 21 jáne shaǵyny – 1060, bul shaǵyn óndiristerdiń basym ekenin jáne shoǵyrlandyrý men jańǵyrtý áleýetin kórsetedi. Bul týraly Úkimet málimdedi.
— 2019-2024 jyldar aralyǵynda hımııa ónerkásibine 1,7 trln teńge ınvestıtsııa — negizinen jeke ınvestıtsııa salyndy. 2025 jyldyń basynan bastap salaǵa salynǵan ınvestıtsııalar kólemi 50,7 mlrd teńgeni qurady, onyń ishinde memlekettik ınvestıtsııalar esebinen — 2,6 mlrd teńge jáne jeke ınvestıtsııalar esebinen — 48,1 mlrd teńge salyndy, — delingen habarlamada.
Búgingi tańda hımııa salasy ártúrli baǵyttaǵy hımııalyq ónimderdiń 240-tan astam atalymyn shyǵarady, olardyń arasynda agrohımııa mańyzdy oryn alady.
— Agrohımııa sektory shyǵarylatyn ónimniń jalpy kóleminiń 22,5%-yn qamtamasyz etedi ári búkil salanyń ósýiniń negizgi qoshǵaýshy kúshi retinde qyzmet etedi. Bul halyq sanynyń ósýine jáne azyq-túlik qaýipsizdigin qamtamasyz etýge, agrarlyq ónimge álemdik suranystyń artýyna, sondaı-aq aýyl sharýashylyǵyn qarqyndy damytý qajettiligine baılanysty, — dep jazdy Úkimetten.
2024 jyly Qazaqstan hımııalyq taýarlardyń 205 túrin eksporttady. Qazaqstandyq hımııa ónimderin negizgi ımporttaýshy elder — Qytaı, Reseı jáne Vetnam. Prezıdenttiń Qazaqstan halqyna Joldaýy aıasynda iri óndiristerdi: polıetılen, karbamıd óndirý zaýyty — «QazAzot Prime» JShS, býtadıen jáne onyń ónimderin óndirý boıynsha — «Býtadıen» JShS, sondaı-aq tazartylǵan tereftal qyshqyly men polıetılentereftalat óndirisi júzege asyrý bastaldy.
Kalıı jáne fosforıt ken oryndaryn ıgerý boıynsha jobalar belsendi júzege asyrylyp otyr. Negizgi ınvestorlardyń qatarynda QazaqKalium Ltd jáne SRPM (BQO-daǵy «Satımolla» ken orny), sondaı-aq fosforıtter salasynda — «Evrohım-Qarataý» JShS (ammofos jáne NPK), «Sozaq-Fosfat» JShS, «Qazfosfat» JShS bar. Sala ekonomıkaǵa mýltıplıkatıvti áser etedi — ol TMK, qyshqyldar, katalızatorlar, boıaý materıaldary, hımııalyq reagentter men tyńaıtqyshtar óndirisimen tyǵyz ıntegratsııalanǵan.
Osy sektorlardy ózara qoldaý ónerkásiptik kooperatsııany kúsheıtedi jáne túpkilikti ónimniń sapasyn arttyrady.
Aıta keteıik, aldaǵy 10 jylda hımııa ónerkásibine 4,8 trln teńge ınvestıtsııa tartylady.