Elimizde er balalarǵa adam papılloma vırýsyna qarsy vaktsına egilýi múmkin
ASTANA. KAZINFORM — Búginde jatyr moıny obyrynyń negizgi qozdyrǵyshy, ıaǵnı adam papılloma vırýsyna (APV) qarsy vaktsına tek qyz balalarǵa egilip jatyr.
— Adam papılloma vırýsyna (APV) qarsy vaktsına AQSh, Aýstralııa, Kanada elderinde 2007-2008 jyldary klınıkalyq zertteýden ótip, engizilgen. Bul memleketter vaktsınanyń oń áserin kórip otyr. Óıtkeni, syrqattanýshylyq pen vırýstyń aınalymy tómendegen. Ol memleketter qyzdardan bastap, búginde 76 memleket uldar arasynda da vaktsınatsııa júrgizedi, óıtkeni erkekterde vırýs tasymaldaýshysy bolýy múmkin, — dedi Densaýlyq saqtaý mınıstrligi janyndaǵy Ulttyq qoǵamdyq densaýlyq saqtaý ortalyǵy basqarma tóraǵasynyń orynbasary Manar Smaǵul adam papılloma vırýsyna qarsy vaktsınatsııaǵa arnalǵan is-shara barysynda.
Mamannyń málimdeýinshe, Qazaqstanda adam papılloma vırýsyna (APV) qarsy 4 valentti vaktsına egilip jatyr, shet memleketter 2015 jyldan bastap 9 valentti vaktsınaǵa kóshken.
Osy oraıda Kazinform tilshisi mınıstrlik ókiline Qazaqstanda er balalar arasynda adam papılloma vırýsyna (APV) qarsy vaktsına egilýi múmkin be degen saýal qoıdy.
— Josparda bar, óıtkeni qaterli isiktiń aldyn alýda óte joǵary tıimdiligin kórsetedi. Qashan ekenin aıta almaımyn, — dep qysqa qaıyrdy spıker.
Aıta ketsek, búgin elordada Ulttyq qoǵamdyq densaýlyq saqtaý ortalyǵynyń uıytqy bolýymen adam papılloma vırýsyna (APV) qarsy ekpe egý sharasy aıasynda konferentsııa ótti. Atalǵan sharaǵa sala mamandary qatysty.
Eske sala keteıik, byltyr qyrkúıekte elimizde jatyr moıny obyrynyń negizgi qozdyrǵyshy — adam papılloma vırýsyna (APV) qarsy qyzdardy jalpy vaktsınalaý bastaldy. Osy oraıda Kazinform agenttiginiń tilshisi Qazaqstanda atalǵan ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajet ekenine sholý jasaǵan edi.
Ótken jyly Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi.
Sondaı-aq elimizde adam papılloma vırýsyna qarsy vaktsınanyń densaýlyqqa áseri zerttelip jatqany aıtyldy.
Odan bólek, áleýmettik jelilerde jáne messendjerlerde adam papıllomasy vırýsy (APV) vaktsınatsııasy bedeýlikke ákeletini týraly jalǵan aqparat tarady.