Elimizde bıologııalyq belsendi qospalardy tańbalaıdy
ASTANA. KAZINFORM – Densaýlyq saqtaý mınıstrligi 2025 jylǵy 28 naýryzda bıologııalyq belsendi taǵamdyq qospalardy (BBQ) sáıkestendirý quraldarymen tańbalaý boıynsha pılottyq jobany iske qosý týraly buıryq shyǵardy.
Pılottyq jobanyń maqsaty - bıologııalyq belsendi taǵamdyq qospalardy (BBQ) sáıkestendirý quraldarymen tańbalaý tetiginiń tolyqtyǵyn, tıimdiligin, nátıjeliligin jáne jetkiliktiligin synaqtan ótkizý. Mindeti – taýarlardyń túpnusqalyǵyn rastaý, Qazaqstan Respýblıkasynyń aýmaǵyna BBQ-ny (onyń ishinde kontrafaktilik ónimderdi) zańsyz ákelýge, óndirýge jáne aınalymmen kúres. Sol sııaqty zańnamada kózdelmegen BBQ aınalymy men óndirisiniń shemalaryn joıý maqsatynda aınalymǵa qatysýshylar arasynda ózara qarym-qatynas ornatý. BBQ aınalymyn esepke alý rásimderin standarttaý jáne birizdendirý.
Sonymen qatar, bul joba arqyly BBQ-ny sáıkestendirý quraldarymen mindetti tańbalaýǵa kóshý qajettiligi aıqyndalady.
Pılottyq jobaǵa kimder qatysa alady?
– Densaýlyq saqtaý mınıstrligi;
– Saýda jáne ıntegratsııa mınıstrligi;
– Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti;
– Ulttyq saraptama ortalyǵy.
Bıologııalyq belsendi qospalar aınalymy salasyndaǵy sýbektiler:
- otandyq BBQ óndirýshiler;
- ımporttaýshylar jáne olardyń el aýmaǵyndaǵy ókildikteri (dıstrıbıýtorlar);
- kóterme saýda uıymdary;
- bólshek saýda uıymdary;
– Taýarlardy tańbalaý jáne qadaǵalaý aqparattyq júıesiniń ákimshisi;
– fıskaldyq derekter operatory.
Pılottyq jobaǵa qatysý erikti túrde júzege asyrylady.
BBQ aınalymyna qatysýshylar tirkelý úshin ótinim beredi jáne pılottyq jobanyń bastalýyna qaramastan, ótinimder qabyldaý jalǵasa beredi.
Joba aıasynda BBQ aınalymyna qatysýshylar óz betinshe sáıkestendirý quraldarymen tańbalaý júrgizip, tıisti málimetterdi tapsyrady.
BBQ tańbalaý kelesi jaǵdaıda júzege asyrylady:
– Qazaqstan aýmaǵynda óndirilgen BBQ – ónim qoımaǵa jóneltilgenge deıin óndiris ornynda;
– EAEO-ǵa múshe emes elderden Qazaqstan aýmaǵyna ımporttalatyn BBQ – EAEO keden aýmaǵyna ákelgenge deıin;
– EAEO-ǵa múshe memleketterden Qazaqstanǵa ákelinetin BBQ – Qazaqstan Respýblıkasynyń memlekettik shekarasynan tys, EAEO múshe memleketterinen ákelý aldynda.
Sonymen qatar pılottyq jobany iske asyrý boıynsha jumys tobynyń quramy men syrtqy ekonomıkalyq qyzmettiń taýar nomenklatýrasynyń kodtary kórsetilgen taýarlar tizbesi bekitildi.
Buıryq qol qoıylǵan kúninen bastap kúshine enedi.
Buǵan deıin bıologııalyq belsendi qospalardyń zııany men paıdasy týraly aqparat jarııalaǵan bolatynbyz.