Elimizde azyq-túliktiń qymbattaý táýekeli bar ma

ASTANA. KAZINFORM – Premer-Mınıstrdiń orynbasary Serik Jumanǵarın azyq-túlik baǵasyn turaqtandyrý maqsatynda atqarylyp jatqan jumystarǵa toqtaldy.

«Bizde áleýmettik mańyzy bar azyq-túlikpen (un, tuz, kúrish, makaron, maı, kartop, qoı eti, sıyr eti, sábiz) 100 paıyz qamtylǵan. Odan bólek, 14 azyq-túlik túrlerimen 80 paıyzy ózimizdiń ónim. Degenmen 5 azyq-túlik boıynsha ımportqa táýeldilik bar. Jalpy alǵanda qus etimen biz ózimizdi 73 paıyzǵa qamtamasyz etemiz, shujyq- 60 paıyz, balyq - 60 paıyz, irimshik pen súzbe - 46 paıyz, qant - 44 paıyz», - dedi Serik Jumanǵarın Úkimet otyrysynan soń ótken baspasóz máslıhatynda.

Sondaı-aq, vıtse-premer elimizde óndirilmeıtin keıbir kókónis, jemis-jıdektiń baǵa turaqtylyǵyna qatysty táýekel týyndaýy múmkindigin aıtty.

«Olardyń qatarynda apelsın, banan, lımon taǵy basqa jemister bar, ıaǵnı qymbattaýy múmkin, biraq aıtarlyqtaı emes. Biz turaqty monıtorıng júrgizip otyrmyz, sońǵy aptada eshbir taýar qymbattaǵan joq. Biraq, ınflıatsııany umytpaǵanymyz jón. Bizde ınflıatsııa dálizi bar - bıyl 6-10 paıyz. Bul baǵanyń ortasha ósýin biz osy shekte kútemiz degendi bildiredi. Ekonomıkanyń damýy baǵanyń biz belgilegen sheginde ósedi», - dep tolyqtyrdy Úkimet basshysynyń orynbasary.

Buǵan deıin Qazaqstan astyǵy men kókóniske Reseıdiń ýaqytsha tyıymynyń áseri týraly jazǵan edik.