Elimizde alǵash ret mektep KASE-de oblıgatsııa shyǵardy
ASTANA. KAZINFORM — Almaty qalasyndaǵy Sh. Ýálıhanov atyndaǵy jekemenshik mektep (Shoqan School) Qazaqstanda alǵash ret bilim berý mekemesi retinde Qazaqstan qor bırjasynda (KASE) oblıgatsııa ornalastyrdy. KASE lıstıngtik komıssııasy 2025 jylǵy 22 mamyrda oblıgatsııalardy resmı tizimge engizý týraly sheshim qabyldady.
Lıstıngke oblıgatsııalar KZ2P00013881 kody boıynsha, nomınaly 1 000 teńge, jalpy kólemi 1 mıllıard teńge jáne aınalym merzimi 3 jyldyq bolyp qosyldy. Oblıgatsııalar boıynsha jyldyq tabys 21,00% deńgeıinde belgilengen. Kýpon tólemderi toqsan saıyn júrgiziledi, al paıyzdardy esepteý ádisi — 30/360.
Sh.Ýálıhanov atyndaǵy jekemenshik mektep 2020 jyly Almaty qalasynda ashyldy. Mekteptiń negizin qalaýshylar — ekolog Ásel Tasmaǵambetova men qazaqstandyq kásipker Keńes Rakıshev. Qazirgi tańda mektepte 1200 oqýshy bilim alýda, sondaı-aq Shoqan School-da daryndy oqýshylarǵa arnalǵan granttar qarastyrylǵan. Mekteptiń ashylýynan beri negizin qalaýshylardyń qarajatynan 173 mıllıon teńgeden astam somaǵa granttar bólindi.
2025 jyly Sh. Ýálıhanov atyndaǵy jekemenshik mekteptiń úsh oqýshysy Garvard ýnıversıtetine jáne Kalıfornııa ýnıversıtetiniń Berklı fılıalyna qabyldandy. Bul oqýshylar mektepte alǵash ret iske qosylǵan Mentorlyq baǵdarlama aıasynda oqýǵa tústi. Atalǵan baǵdarlama mekteptiń negizin qalaýshylar — kásipker Keńes Rakıshev pen ekolog Ásel Tasmaǵambetovanyń bastamasymen júzege asyrylýda.
— Oblıgatsııalardy shyǵarý týraly sheshim uzaq merzimdi damý josparlaryn eskere otyryp qabyldandy. Syrtqy ınvestıtsııalardy tartý oqý ordasyna turaqty damý salasynda birqatar iri jobalardy júzege asyrýǵa múmkindik beredi jáne Qazaqstannyń daryndy oqýshylaryn qoldaýdy jalǵastyrýǵa jol ashady, — dedi ekolog, Sh. Ýálıhanov atyndaǵy jeke mekteptiń negizin qalaýshy Ásel Tasmaǵambetova.
Oblıgatsııalardy shyǵarý boıynsha qarjylyq konsýltant — Almaty qalasyndaǵy «Teníz Capital Investment Banking» aktsıonerlik qoǵamy. Oblıgatsııalardyń saýda kody — SWPSb1.
Qundy qaǵazdardy qor naryǵyna shyǵarý bilim berý ınfraqurylymyn keńeıtý jáne uzaq merzimdi strategııalyq jobalardy júzege asyrý úshin jańa múmkindikter ashady. Lıstıngtik komıssııanyń sheshimi kúshine ený kúni men oblıgatsııalar boıynsha saýdanyń bastalý kúni qosymsha habarlanatyn bolady. Qujattyń tolyq mátini men qosymsha aqparatty KASE resmı saıtynan alýǵa bolady.