Elimizde 69 sút fermasy jumys istep tur
PAVLODAR. KAZINFORM — Elimizde 47 sút-taýarly fermasy iske qosylsa, ımportqa táýeldilik birshama azaımaq. Bul týraly QR Aýyl sharýashylyǵy mınıstrliginiń baspasóz qyzmeti habarlady.
Mınıstr Aıdarbek Saparov Pavlodar oblysyna jumys sapary kezinde aımaq turǵyndary jáne aýyl sharýashylyǵy taýar óndirýshilerimen kezdesti.
Kezdesýde vedomstvo basshysy Soltústik Qazaqstan oblysynyń tájirıbesi zamanaýı sút fermalaryn salý baǵdarlamasynyń tıimdiligin kórsetip kele jatqanyn atap ótti.
— Qazirgi ýaqytta elde 69 sút-taýarly fermasy jumys istep tur, taǵy 47 nysannyń qurylysy júrgizilip jatyr. Olar iske qosylǵannan keıin sút óndirisi jylyna 600 myń tonnaǵa artyp, ımportqa táýeldilik edáýir azaıady, — delingen aqparatta.
Mal sharýashylyǵyn qoldaý maqsatynda 50 mlrd teńge kóleminde aınalym qarajatyn jyldyq 5% mólsherlememen nesıelendirý baǵdarlamasy iske asyrylyp otyr. Sonymen qatar, mal sharýashylyǵyn damytý jónindegi jańa baǵdarlama ázirlenip jatyr, ol kredıttik ónimder jelisin keńeıtýdi kózdeıdi.
Óńdeý salasynda 2025 jyly 44 mlrd teńge kóleminde jeńildetilgen nesıelendirý qarastyrylǵan, onyń ishinde 62 jobaǵa 23,9 mlrd teńge bólindi.
Jedel derekterge sáıkes, elimizde 13,3 mln gektar dándi daqyl orylyp (83%), ortasha ónimdilik 15,5 ts/ga deńgeıinde 20,8 mln tonna astyq bastyryldy.
Pavlodar oblysy boıynsha 809 myń tonna astyq, 834 myń tonna kartop, 217 myń tonna kókónis jınaldy.
— Pavlodar oblysy jaqsy nátıjeler kórsetip otyr — bul júıeli tásildiń, tehnologııalyq jańarýdyń jáne fermerlerdiń memlekettik baǵdarlamalarǵa belsendi qatysýynyń nátıjesi. Qabyldanyp jatqan barlyq sharalar agrarlyq sektordyń áleýetin nyǵaıtyp, onyń el ekonomıkasyna qosqan úlesin arttyrýǵa baǵyttalǵan, — dedi Aıdarbek Saparov.
Kezdesý barysynda óńirdiń aýyl sharýashylyǵy taýar óndirýshileri sýbsıdııalaý, jylyjaı sharýashylyǵyn damytý, sýarý júıelerin jetildirý jáne memlekettik qoldaý tetikterin jetildirý boıynsha suraqtar qoıdy. Mınıstr barlyq usynystar men bastamalardyń aldaǵy baǵdarlamalyq qujattarda eskeriletinin atap ótti.
Aıta keteıik, Pavlodarda sút óndirisiniń kólemi 31,5 myń tonnaǵa artty.