Elimiz konstıtýtsııalyq jańarý dáýiriniń tabaldyryǵynda tur — senator
QYZYLORDA. KAZINFORM — Júıeli ári myqty konstıtýtsııalyq reforma — Ulttyq quryltaıda Memleket basshysy toqtalǵan mańyzdy máselelerdiń eń bastysy. Bul týraly Parlament Senatynyń depýtaty Gennadıı Shıpovskıh aıtty.
Bul baǵyttaǵy bastamalar 2022 jyldan beri aıtylyp keledi. Quryltaıda naqty úsh ózekti másele aıqyndaldy.
— Birinshi másele Parlamenttik júıege qatysty. Bolashaqta ol 145 depýtattan jáne 8 komıtetten turatyn bolady. Bul — konstıtýtsııalyq reformanyń tek Senattaǵy ózgeristermen shekteledi degen pikirdiń qate ekenin aıqyn kórsetedi. Qazirgi qurylymda Májiliste 7 komıtet, Senatta 6 komıtet bolsa, aldaǵy ýaqytta birtutas ári yqsham jańa júıe qalyptasady. Bul — Parlament jumysynyń tıimdiligin arttyrýǵa baǵyttalǵan mańyzdy qadam. Ekinshi másele — Vıtse-prezıdent ınstıtýtyn engizý. Bul bastama bılik júıesinde saıası sabaqtastyq pen turaqtylyqty qamtamasyz etýge múmkindik beredi. Vıtse-prezıdent Prezıdenttiń ókilettigin júzege asyrýda qosymsha tirek bolyp, basqarý úderisindegi birqatar mańyzdy máseleni úılestiredi. Memleket basshysy atap ótkendeı, jańa laýazymnyń negizgi basymdyqtarynyń biri — halyqaralyq forýmdar men syrtqy saıasat. Osy turǵyda Vıtse-prezıdent ınstıtýty prezıdenttik bılikke naqty qoldaý kórsetetin tıimdi tetik bolmaq, — dedi senator.
Úshinshi másele — Ulttyq quryltaı men Qazaqstan halqy Assambleıasynyń tarıhı mıssııalary.
— Bul ınstıtýttar óz mindetterin abyroımen atqardy. Bolashaqta olardyń ornyna «Qazaqstannyń Halyq Keńesi» atty jańa joǵary konsýltatıvtik organ qurylmaq. Onyń quramynda Qazaqstan halqy Assambleıasynyń ókilderi de bolady. Sondyqtan «Assambleıany taratyp jatyr» degen pikir qate. Bul qurylym elimizdegi birlik, turaqtylyq pen qoǵamdyq kelisimdi nyǵaıtý jolynda úlken rólge ıe. Qoryta aıtqanda, quryltaı elimizdiń konstıtýtsııalyq jańarý dáýiriniń tabaldyryǵynda turǵanyn kórsetedi, — dedi Gennadıı Shıpovskıh.
Buǵan deıin Senat depýtaty Amangeldi Esbaı Memleket basshysynyń Ulttyq quryltaıdyń V otyrysyndaǵy usynystaryna qatysty pikir aıtqan bolatyn.