Elimizde veterınar dárigerlerdiń mártebesi bekitilmek

ASTANA. QazAqparat – Qazaqstanda veterınar mamandardyń mártebesi zańmen bekitilmek. Bul týraly Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń tóraǵasy Asqar Jaqypbaev málim etti, dep habarlaıdy QazAqparat tilshisi.

«Ókinishke qaraı, 11/93 qaýlysyna sáıkes veterınarlardyń mártebesi zańmen naqtylanbaǵan. Qujatta veterınarlar týraly «taǵy sol sııaqty» degen bólikte aıtylǵan. Bul teris áser etedi. Sondyqtan, aldymen, veterınar dárigerlerdiń mártebesi bekitiledi. Ustazdarda bar, dárigerlerde bar, al veterınarlarda mártebe joq», – dedi Asqar Jaqypbaev Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, arnaıy mártebe berilgen jaǵdaıda eńbek demalysyna shyqqan veterınarǵa saýyqtyrý boıynsha eki aılyq jalaqy kóleminde járdemaqy, sondaı-aq ǵylymı dárejesine qaraı ústemaqy qarastyrylyp otyr.

AShM ókili aıtqan kelesi jańashyldyq - veterınarlar arnaıy kıim jáne qural-jabdyqpen qamtamasyz etilmek.

Eske salsaq, bıyl veterınar mamandardyń aılyǵyna 35 paıyz ústemeaqy qosylatyny aıtylǵan edi.