Elimizde test jasaıtyn 10 zerthana ashylady
«Qazirgi ýaqytta dúnıe júzi boıynsha genetıkalyq PTsR degen bir test qana dıagnoz qoıýǵa bekitilgen. Ekspress test paıda bolǵanymen, naýqastyń dertin rastap, emdeýge jaramaıdy. Elimizde PTsR test jasaıtyn 19 zerthana bar. Olardyń kúnine 6 000 test jasaýǵa múmkindigi bar. Qańtardan bastap 25 myń test ótkizildi. Ótken táýlik boıynsha bir jarym myń test jasap jatyrmyz. Sonymen el boıynsha 6 myń test jasaýǵa múmkindigimiz bar. Nur-Sultan, Almaty qalalarynda júkteme kóp ekenin eskerip, elordada test jasaıtyn 3 zerthana ashtyq. Taǵy 2 zerthana osy aptada ashylady. Almatyda taǵy 3 zerthana ashylady. Basqa óńirlerdi qosqanda jalpy 10 zerthana ashylmaq. Osylaısha sáýir aıynyń basynda 12 myń test jasaýǵa múmkindik bolady» , - deıdi QR Densaýlyq saqtaý mınıstri Eljan Birtanov.
Ol qazirgi ýaqytta 300 myń test bar ekenin aıtty.
«Búgin memlekettik komıssııa qosymsha taǵy 300 myń test satyp alý jóninde sheshim qabyldady. Sonda elimizde 600 myń test bolady. Epıdemııany baqylaý úshin bir naýqasqa 200 test jasaý múmkindigi bolady. Bul – Koreıanyń deńgeıi. Otandyq kásipkerlerdiń demeýshiligimen eskpres test qoldaný múmkindigin de beremiz. Algorıtm bekitilgen. Memleket tarapynan 380 myń tegin test ótkiziledi. Ol sozylmaly aýrýy bar, qart adamdar nemese karantınde jatqan azamattar, shetelden kelip jatqan azamattar sııaqty táýekeli joǵary azamattardy skrınıngten ótkizýge qoldanylady. Bul testi tek memlekettik emes, jeke menshik zerthanalarǵa ótkizýge de ruqsat berdik. Bul tek bekitilgen standart boıynsha jasalýy kerek. Arnaıy azamattar tegin alady jáne aqyly deńgeıde alýǵa da múmkindik beriledi», - deıdi ol.
