Elimizde qaldyq polıgondarynyń sany artady
«Qoqys polıgondary máselesi jyl saıyn kóteriletin másele. Ótken jyly vıtse-mınıstr bolǵanda ekologııa máseleleri meniń quzyretimde boldy. Sanktsııalanbaǵan qoqyspen kúreste óńir ákimdikterimen birlesip jumys istedik. Bul jerde qandaı problema? Qaldyq, qoqystardy tastaý, óńdeý jáne suryptaý boıynsha júıe joq. Saldarynan sanktsııalanbaǵan qaldyq, qoqystar kóbeıe beredi. Ekologııa kodeksine sáıkes jergilikti atqarýshy organdar qaldyqtardy joıý boıynsha keshendi jospar ázirleýi tıis. Ótken jyly biraz óńir keshendi jospar ázirleýde qıyndyqtardyń baryn aıtty. Ol josparda qaldyqtardyń kólemi, sol jerdegi halyqtyń sany taǵy sol sııaqty málimetter kórsetiledi. Qoqys konteınerlerin ornatýda joǵarydaǵy derekter eskeriledi. Degenmen óńir ákimdikter keshendi jospardy ázirleı almady», - dedi Zúlfııa Súleımenova Astana halyqaralyq forýmy barysynda BAQ ókilderiniń saýalyna jaýap bere turyp.
Mınıstr sanktsııalanbaǵan qaldyqtarmen kúres baǵytynda ádistemelik nusqaýlyq ázirlengenin aıtty.
«Bizge eldegi bar qaldyq polıgondardy zańdastyrý týraly usynystar túsip jatyr. Biz oǵan qarsymyz. Bul jerde jańa ekologııalyq talaptarǵa sáıkes keletin polıgondar ashý kerek. Polıgondar salýda jergilikti halyqtyń sany da eskerlýi tıis. Osy oraıda biz polıgondar salý boıynsha tıptik jobalardy ázirleýdi usynyp otyrmyz. Bul máseleni Indýstrııa jáne ınfraqurylymdyq damý mınıstrligimen birlesip qarastyryp jatyrmyz. Qoqys konteınerlerin ornatý men polıgondar salýda ınfraqurylym talapqa saı bolýyn eskerý kerek. Ásirese halyq az ornalasqan eldimeken, aýdandarǵa osy másele ózekti», - deıdi vedomstvo basshysy.
