Elimizde eresekter tólqujatynyń betteri kóbeıýi múmkin
«Shetelge jıi shyǵatyn azamattarǵa yńǵaıly bolý úshin eresek azamattarǵa arnalǵan tólqujattyń betterin 48-ge deıin arttyrý usynylyp otyr. Qazirgi tólqujatta 36 bet bar. Árıne, bul kóbeıgennen keıin onyń baǵasy da ósedi. 8 AEK-tan (aılyq eseptik kórsetkish) 12 AEK-ke deıin. Sebebi bul ózgeris shet memleketterge jumys babymen jıi bolatyn azamattar úshin óte yńǵaıly. Olar Qazaqstanmen qatar basqa da elderdiń shekarasynan ótedi. Degenmen búgingi 36 betti tólqujat qoldanysta qala beredi, merzimi de sol kúıinshe 10 jylǵa deıin jaramdy bolmaq», - dedi Erlan Smaılov Májilistiń zańnama jáne sot-quqyqtyq reforma komıtetiniń otyrysynda jasaǵan baıandamasynda.
Sondaı-aq, depýtat 36 betti tólqujatqa arnalǵan memlekettik baj kólemin ózgertpeý kerektigin aıtty.
«Tólqujat paraqtarynyń sanyn kóbeıtý shetelge jıi shyǵatyn azamattardyń shekaradan erkin ótýi men kóptegen elde bolýyna múmkindik beredi. Jáne jańa vıza alý úshinde oń áseri bolady. Mysaly, azamattyń 5 jyldyq Shengen vızasy bar, biraq onyń tólqujatynda shekarany ótkeni týraly belgini qoıýǵa arnalǵan paraqtar sany bitip qaldy. Bul jaǵdaıda ol jańa tólqujat rásimdep, vızany jańa tólqujatqa aýystyrý úshin shetel elshiligine qaıta habarlasýy kerek. Bul óz kezeginde artyq sharýa jáne táýekelge alyp kelýi múmkin», - deıdi ol.
Buǵan deıin habarlaǵanymyzdaı, Qazaqstanda balalar tólqujatynyń qoldaný merzimin qysqartý usynyldy.
Aıta keteıik, búgin QR Parlamenti Májilisiniń zańnama jáne sot-quqyqtyq reforma komıtetinde QR keıbir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly zań jobasynyń tanystyrylymy ótti.
