Elimizde altyn óndirisi 0,7 paıyzǵa artty
ASTANA. QazAqparat - 2019 jyldyń qańtar aıynda Qazaqstanda óńdelmegen jáne jartylaı óńdelgen ne bolmasa untaq túrindegi altyn óndirisiniń kólemi 6 308 kelini qurady. Bul 2018 jyldyń qańtaryndaǵy mólsherden 0,7 paıyzǵa artyq, dep habarlaıdy QazAqparat tilshisi.
QR Ulttyq ekonomıka mınıstrligi Statıstıka komıtetiniń deregine sáıkes, esepti kezeńdegi óńdelmegen jáne jartylaı óńdelgen nemese untaq túrindegi kúmis óndirisiniń kólemi 57 175 keli boldy. Bul da 2018 jyldyń qańtaryndaǵy óndiris kóleminen 4,1 paıyzǵa artyq.
Aıta keterligi, qańtarda keıbir baǵaly metaldar óndirisiniń birshama tómendegeni baıqalady. Naqty aıtqanda, óńdelmegen alıýmınıı, alıýmınıı totyǵy óndirisiniń kólemi 2018 jyldyń qańtarymen salystyrǵanda 13,2 paıyzǵa tómendep, 131 134 tonna boldy. Al óńdelmegen tazartylǵan qorǵanys óndirisi 20,7 paıyzǵa azaıyp, 10 470 tonnany, óńdelmegen myrysh óndirisi 3,5 paıyzǵa kemip, 27 492 tonnany qurady. Óńdelmegen tazartylǵan, qospasyz mys óndirý kólemi 2,8 paıyzǵa ósip, 36 787 tonnaǵa jetti.
Esterińizge sala ketsek, buǵan deıin QR UEM Statıstıka komıteti 2018 jyldyń qańtar-qarasha aılarynda Qazaqstanda óńdelmegen jáne jartylaı óńdelgen nemese untaq túrindegi altyn óndirisiniń kólemi 88 491 kelini quraǵanyn jarııalaǵan edi. Bul ótken jyldyń sáıkes kezeńimen salystyrǵanda, 14,1 paıyzǵa kóp.
Esepti kezeńde óńdelmegen jáne jartylaı óńdelgen nemese untaq túrindegi kúmis óndirisiniń kólemi 879 737 kelige jetti. Bul ótken jylmen salystyrǵanda 8,3 paıyzǵa artyq kórsetkish bolatyn.
Avtor: Ashat Ahmetbekov
