Elimizde 6 800 turmysy nashar otbasy bar

ASTANA. QazAqparat – Elimizde 6 800 turmysy nashar otbasy bar. Bul týraly Úkimet otyrysynda Іshki ister mınıstri Marat Ahmetjanov aıtty, dep habarlaıdy QazAqparat tilshisi.

«Sońǵy másele – qazir elimizde 6 800 turmysy nashar otbasy, olarda 10 myń bala bar. Olar táýekel aýmaǵyna kiredi. Sondyqtan, memleket tarapynan erekshe nazardy qajet etedi. Zańnamada olardyń medıtsınalyq-áleýmettik esebin qalyptastyrý týraly norma kózdelgen. Biraq, bul is-sharalar iske asyp jatqan joq. Medıtsınalyq-áleýmettik esepke alý erejeleri áli kúnge deıin ázirlenbegen», - dedi Marat Ahmetjanov.

Osyǵan baılanysty mınıstrdiń aıtýynsha, atalǵan salaǵa jaýapty memlekettik organ retinde Eńbek jáne halyqty áleýmettik qorǵaý mınıstrligin belgileý qajet.

Buǵan deıin mınıstr bıyl otbasylyq-turmystyq salada 668 qylmys jasalǵanyn aıtty.

Sondaı-aq, mınıstrdiń aıtýynsha, turmystyq zorlyq-zombylyq problemasyn kúshteý sharasymen sheshý múmkin emes.