Eldiń basym bóliginde jańbyr jaýady

ASTANA. KAZINFORM — ASTANA. KAZINFORM — Qazgıdromet 17 qyrkúıekke arnalǵan aýa raıy boljamyn jarııalady. 

Sınoptıkterdiń málimetinshe, Qazaqstannyń basym bóligi ońtústik tsıklonnyń yqpalynda bolyp, jańbyr jaýyp, naızaǵaı oınaıdy.

— Tek eldiń batysy men ońtústik-batysynda jaýyn-shashynsyz aýa raıy bolady. Respýblıka boıynsha jel kúsheıip, ońtústikte shańdy daýyl, soltústik-batysta jáne ortalyqta túngi jáne tańerteńgi ýaqytta tuman bolady, — delingen habarlamada.

Túnde Soltústik Qazaqstan oblysynyń batysynda 1 gradýsqa deıin úsik júrýi múmkin.

Jetisý oblysynyń soltústigi men shyǵysynda, Almaty oblysynyń ońtústigi men shyǵysynda, Batys Qazaqstan oblysynyń soltústigi men shyǵysynda, Aqtóbe oblysynyń batysy, ortalyǵy men soltústik-shyǵysynda, Mańǵystaý oblysynyń ońtústiginde joǵary órt qaýpi kútiledi.

Almaty, Túrkistan, Qyzylorda, Atyraý, Jambyl oblystarynda, Jetisý oblysynda, Ulytaý oblysynyń ońtústiginde, Mańǵystaý oblysynyń soltústik-batysy men ońtústik-shyǵysynda, Batys Qazaqstan oblysynyń batysy men ońtústiginde, Qostanaı oblysynyń ońtústik-batysynda, Qaraǵandy oblysynyń ońtústiginde, Aqtóbe oblysynyń batysy men ortalyǵynda tótenshe órt qaýpi boljanýda.

Aıta ketelik Jerdiń qorǵanysh ozon qabaty qalpyna kelip jatyr.